Siumut kommuninut tamanut sassarnissaa akuerineqarpoq
Qinersinermut ataatsimiititaliap Siumut Kommune Qeqertalimmi aamma Kommune Kujallermi sassartitaqarsinnaanera akueraa, naak qinigassanik allattorsimaffik siusinnerusukkut kukkusumut, piffissarli sioqqullugu, tunniussimagaluaraa.
Siumup qinigassanngortitani tamaasa kommuninut assigiinngitsunut nalunaarutiginagit Kommuneqarfik Sermersuumulli ataatsimoortillugit nassiummagit, kukkuneq taama ajortiginngilaq. Partii kommunini tunniussivissaq sioqqullugu nassiussaqanngitsooraluartoq, sassartitsinissamut Qinersinermut ataatsimiititaliamit akuerineqarpoq. Ataatsimiititaliaq qinigassanngortitaqarnissaq pillugu ullumi ataatsimiingaatsiarpoq.
Qinersinermut ataatsimiititaliaq tusagassiorfinnut nalunaaruteqarluni nassuiaavoq.
- Qinersinermut ataatsimiititaliap aalajangerpaa, pisoq ajusaarnartorujussuusoq. Qinersinermut ataatsimiititaliap peqatigitillugu aalajangerpaa, kukkuneq ima ajortiginngitsoq, immineerluni Siumup partiip qinigassanngortittunut allattorsimaffianik Kommune Kujalliup aamma Kommune Qeqertaliup qinersiviini tunniussanik tigusinnginnissamut tunngaviliissasoq. Qinersinermut ataatsimiititaliap tamanna tunulia qutaralugu aalajangerpaa, tunniussineq atuuttussatut isigineqartariaqartoq, Qinersinermut ataatsimiititaliaq aalajangerpoq.
Kukkuluttorneq
Siumut qinigassanngortitami allattorsimaffii tamangajaasa kommunimut kukkusumut, tassa Kommuneqarfik Sermersuumut, nassiussimagai ullumi paasineqarpoq. Kommunimut qinersinissamut sassartunik allattorsimaffik qinersivimmut atuuttumut kingusinnerpaamik 23. februar nalunaaqutaq 12.00 tunniunneqareersimasussaavoq. Siumullu nassiussani Kommune Qeqertalimmut aamma Kommune Kujallermut ingerlatinngitsoorsimavai, taamaattorli piffissaliussaq sioqqullugu kommunimut allamut nassiussisimalluni.
Qinersinermut ataatsimiititaliaq piaartumik ataatsimiigiaqquneqarpoq, Siumut kommunini pineqartuni qinigassanngortitaqassanersoq pillugu oqaluuserinnittoqartariaqarmat.
Siunissamili kukkuluttornerit taama ittut pinngitsoortikkumallugit Qinersinermut ataatsimiititaliaq partiinut tamanut kaammattuuteqarpoq.
- Peqatigitillugu Qinersinermut ataatsimiititaliap sakkortuumik innersuussutigaa, partiit tamarmik annertunerusumik sissuernerusariaqartut, nalunaarfissatut piffissaliussat soorlu qinersinissamut qinigassanngortittut nalunaarutigineqarnerat pineqaraangat. Qulakkeerneqartariaqarpoq, nalunaarutiginninnermut allattuiffiit immersorneqarneri eqqortuunissaat aamma piffissaq qinersinernut ataasiakkaanut atuuttoq killiliussaq sioqqullugu tunniunneqartarnissaat.
