Siumut isornartorsiuivoq: Angerlarsimaffeqanngitsunut tupeqarfik akisuallaarujussuarpoq
Kommuneqarfik Sermersuumi kommunalbestyrelsimut ilaasortat Siumumumeersut angerlarsimaffeqanngitsunut tupeqarfiliornermut tunngatillugu borgmesteri Charlotte Ludvigsen isornartorsiorpaat
Angerlarsimaffeqanngitsunut tupeqarfiliornissaq sukkavallaartumik aalajangiunneqarsimasoq akisuallaartorlu Kommuneqarfik Sermersuumi kommunalbestyrelsimi ilaasortat Jens Kristian Berthelsen aamma Peter Davidsen, tamarmik Siumumit, isornartorsiuipput.
Aalajangiineq borgmesterimit Charlotte Ludvigsenimit illersorneqarpoq.
Angerlarsimaffeqanngitsunut tupeqarfiliortoqarnissaa kommunimit marsimi aalajangerneqarpoq, taakku Xploration Services Greenland-imit attartorneqarlutik. Attartuinermulli isumaqatigiissut akisuallaartoq Siumumi ilaasortat isumaqarput.
- Toqqit 44-it attartorneri qaammatini sisamani akeqarsimapput kr. 3.948.800,00 tassa imaappoq tupeq ataaseq qaammatini sisamani kr. 89.745,00 taavalu tupermi ataatsimi inuit marluusinnaallutik imaluunniit sisamaasinnaallutik, Jens Kristian Berthelsen aamma Peter Davidsen allapput, nangillutillu:
- Paasiniaanitsinni paasivarput toqqit angerlarsimaffeqanngitsunit inunnut 70-nik atorneqartut, taavalu ajoraluartumik tupit siallertillugu akimut kuuttarsimasut. Taamatut sukkasuumik aalajangiineq aamma kommunimiit susassaqarfimminngaanniit isumasiueqqaarnani pinera akueriuminaatsipparput.
Iliuuseqartoqapallattoqartariaqarsimasoq
Coronavirusertoqanerata pissutigisaanik iliuuseqapallattoqartoqartariaqarsimasoq Kommuneqarfik Sermersuumi borgmesteri Charlotte Ludvigsen isornartorsiuinermut akissuteqarluni oqarpoq. Xploration Services Greenlandimik isumaqatigiissut millioninik sisamangajannik naleqartoq uppernarsarpaa.
- Angerlarsimaffeqanngitsullu sukkasuumik unnuiffissaanik ujaarlertariaqarsimavugut illersorneqartariaqarmata, katersuutinnginnissaat pinaveersaartinniarlugu.Tamassumap nalaani toqqagassat tassaasimapput hotel-it immaqaluunniit toqqit, taamanilu toqqit akikinnerpaajusimapput inunnut 80-inik unnuiffigineqarsinnaasut, akivoq.
Kommunimi aningaasaqarnermut ataatsimiititaliaq isumaqatigiissut pillugu maajip 14-ani ilisimatinneqartut Jens Kristian Berthelsen aamma Peter Davidsen oqarput.
Tamanna kommunip attaveqaqatigiinnermut pisortaata Lars Damkjærip uppernarsarpaa. Coronavirusertoqarnerata pissutigisaanik ataatsimiititaliaq ataatsimiinngitsoq oqaatigaa. Pilersaarutit pillugit Charlotte Ludvigsen oqarpoq ammasumik gruppit siulittaasuinut ilisimatitsisarsimalluni.
Akeqanngitsumik neqeroorfigineqarneq
Sooq Xploration Services Greenland isumaqatigiissuteqarfigineqarsimanersoq Siumumi ilaasortanit paasiuminaatsinneqarpoq:
- Tupernik attartortoqalinnginnerani suliffeqarfik alla (ilisimaaraarput suliffeqarfik sorliunersoq) neqeroorsimagaluarpoq akeqanngitsumik, tassa containerinik ineqarfiusinnaasunik inunnullu katillugit 44-inik unnufiffiusinnaasunik. Aamma saniatigut periarfissamik neqeroorput containeriutai pisiarineqarsinnaasut 1,5 million koruunilerlugit, taamaalilluni containeriutai inunnik 44-inik unnuiffiusinnaasut iluarsartuuteriarlugit naleqqussariarlugit pisiarineqarsinnaagaluarput allanillu containerinik ilallugit, taakkulu containerit najugaqarfiusinnaasut ataavartumik Kommuneqarfik Sermersuup pigilissagaluarpai attartuinnarnagit. Tulliani corona takkuteqqissagaluarpat piareersimasunik pigeriikkanik unnuiffissanik peqareertoqassagaluarpoq aammalu allatut atorneqarsinnaallutik.
Aalajangerneq illersorneqarpoq
Xploration Services Greenland aallaqqaataani kisiartaalluni neqeroorusiorsimasoq Charlotte Ludvigsenip oqaatigaa.
- Aatsaat isumaqatigiissut inissereermat aperineqarsimagaluarpugut oqaatitsigut (mundtligt) soqutiginnissinnaanersugut, sulili inissiat taakku naammassimanavianngikkaluarput. Qaqugukkulluunniit aaliangikkakka illersorsinnaavakka, nalunnginnakku inunnik illersuiniarlunga ajunngitsumillu siunertaqarlunga iliuuserisaammata, Charlotte Ludvigsen oqarpoq.
Isumaqatigiissut qaammatini pingasuni atuuttoq Charlotte Ludvigsenip ilisimatitsissutigaa, periarfissaqarluni isumaqatiginninniaqqinnissamut juni naanerani pisariaqassappat, coronavirusip ineriartornera apeqqutaalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...