Siumut inuusuttai: Marlunnik qinigaaffeqartoqartillugu nutaat qinigaasinnaasanngillat

Siumut Inatsisartuni ilaasortaatitaanni qulingiluaasuni pingasut kommunalbestyrelsemi aamma ilaasortaapput.

Taama ilaasortaaffeqartoqarpoq naak Siumut 2017-imi ataatsimeersuarnerani amerlanerussuteqartunit aalajangersimagaluartoq marlunnik qinigaaffillit politikkikkut ataasiinnarmik suliffigisassaminnik toqqaasassasut. Taama aalajangernermi Inatsisartunut kommunalbestyrelsemullu qinigaaffeqartut politikkikkut sorlermi sulissanerlutik toqqaasartussaapput.

Aalajangernermit ukioq ataaseq qaangiuttoq partiimi aqutsisut amerlanerussuteqartut aalajangigaat malinnagu ingerlatsilerput, politikerit marlunnik qinigaaffeqartut atuutsilerlugit. Tassunga tunngavilersuutigineqarpoq partiip aalajangersagai malillugit partiip soqutigisai annerusumik anguneqarsinnaatillugit, kommuninilu sunniuteqarneq annaaneqassanngippat, marlunnik qinigaaffeqarneq atorsinnaasariaqartoq.

- Siumut ataatsimeersuarnerani erseqqissarneqarpoq marlunnik qinigaaffillit sorlermi sulerusunnerlutik toqqartalissagaat. Taamaattumik marlunnik qinigaaffeqarneq atorunnaarpoq, aalajangiinerlu tamanna attatiinnartariaqaraluarpoq, Siumut inuusuttaanni siulittaasoq Inuk Kielsen Fleischer Sermitsiaq.AG-mut oqarpoq.

Marlunnik qinigaaffeqarneq atorunnaarli

Siumut 2017-imi ataatsimeersuarnerani tunngavilersuutigineqarpoq marlunnik qinigaaffeqartut pingaarnersiuinerminni Inatsisartuni sulineq pingaarnerutilertaraat, kommunalbestyrelsemi ataatsimiinnerit tunulliuttariaqartarlugit. Tamanna suli atuuttoq, Inuk Kielsen Fleischer isumaqarpoq.

Taamaammat isumaqarpoq aalajangiineq attatiinnarneqartariaqartoq, kommunalbestyrelseni sunniuteqarnissaq annikilleqqunagu.

- Marlunnik qinigaaffeqarnermut tunngatillugu aalajangernerup atorunnaarsinneqarnissaa kissaatiginngilarput. Marlunnik qinigaaffeqarnerup atunnginnerani sulisinnaasut amerlanerusut anguneqarsinnaapput, sumiiffinnilu tamani sunniuteqarnerulersinnaalluta, oqarpoq.

Taama oqarneq inuiaqatigiilerinermi ilisimatuup isumaqatigaa. Birger Poppel isumaqarpoq marlunnik qinigaaffillit Inatsisartut kommunalbestyrelsellu iluani uteqattaarlutik suliniarsarissappata, taava sunniuteqarsinnaaneq annikillisinnaasoq. Ataatsimiinnissanut piareersarnissaq pingaartumik sivikinnerulersinnaavoq, politikerit sulianut misissuisinnaanerat killeqalerluni.

Marlunnilli qinigaaffeqartoqartillugu politikkikkut suliaqarnermik soqutigisallit nutaat Inatsisartuni kommunalbestyrelsenilu suliaqalernissaminnut periarfissaat aamma annikinnerulertarpoq.

- Marlunnik qinigaaffeqartoqanngitsuuppat, taava innuttaasut politikkimik suliaqarnissamik soqutigisaqartut kajumissaarnissaannut periarfissaqarnerussagaluarpoq, suliaqalernissaannullu inissaqartitsisoqarnerulluni. Taassuma ilagaa politikkimik suliaqalerusuttut eqqarsassanngitsut politikkimik suliaqassagaanni ulaperujussuartoqartariaqartoq angalaannavittuullunilu. Immaqa kommunip iluani nunallu tamarmiusup iluani politikkikkut sulinissaq ornigineqarnerulissagaluarpoq, Birger Poppel oqarpoq.

Inuk nammineq aalajangissaaq

IA-p inuusuttai, Inuusuttut Ataqatigiit, isumaqarput marlunnik qinigaaffeqarneq atussanerlugu qinigaasup nammineerluni aalajangissagaa.

- Takoreerparput Inatsisartuni kommunalbestyrelsemilu ilaasortaaffiit marluutillugit sulisinnaaneq aamma ajunngitsortaqartoq. Politikerip nammineerluni tamanna aalajangersinnaavaa, Lars Salik Kielsen oqarpoq.