kommuninut qinersineq 2017
Siumut illoqarfiit pingaarnersaata kommuniani sunniuteqarpiassanngillat
Ataatsimiititaliani siulittaasuuffiit arfiniliinnaasut, illoqarfiit annersaatalu kommuniani pingaarutilimmi Nunatsinni partiit annersaanni Siumumi kommunalbestyrelsimi arfiniliinnarnik ilaasortatitaqarluni sunniuteqarpallaarsinnaanngitsutut inissisimavoq.
Inissitsiternermut isumaqatigiissut IA-p, Demokraatit aamma Atassutip atsioqatigiissutigisaanni ullumi Nuummi pingasunngornermi saqqummiunneqartumi tamanna takuneqarsinnaavoq.
Nivi Olsen borgmesterip sinniisorissavaa
Kina borgmesterinngussanersoq nalornissutigineqarsimanngilaq, kisianni borgmesterip sinniisussaa taarserneqassaaq, Nivi Olsenip Demokraatineersup Justus Hansen kingoraassavaa. Nivi Olsen politikerini Demokraatineersuni taaguunneqarnerpaavoq.
Ataatsimiititaliat imatut agguataarneqarput:
- Borgmesteri – Asii Chemnitz Narup (IA)
- Bormesterip sinniisussaa siulleq – Nivi Olsen (D)
- Borgmesterip sinniisussaata aappaa – Malene Lynge (IA)
- Aningaasaqarnermut inuussutissarsiornermut ataatsimiititaliami siulittaasoq: Asii Chemnitz Narup
- Sanaartornermut avatangiisinullu ataatsimiititaliami siulittaasoq: Malene Lynge (IA)
- Atugarissaarnermut suliffeqarnermullu ataatsimiititaliami siulittaasoq: Charlotte Ludvigsen (IA)
- Meeqqanut atuarfinnullu ataatsimiititaliaq: Nivi Olsen (D)
- Meeqqanut ilaqutariinnullu ataatsimiititaliaq: Uju Petersen (IA)
Aamma atuaruk: Sermersuup nutaamik pisortartaarnikkut atuarneq ukkatarinerulerpaa
Siumut aningaasaqarnermut inuussutissarsiornermullu ataatsimiititaliami marlunnik ilaasortaatitaqassasut takuneqarsinnaavoq, ataatsimiititalianilu sinneruttuni sisamani ataatsimik ilaasortaatitaqassapput. Kommunimut qinersineq taamaalilluni partiit annersaannut illoqarfiit annersaanni ajorsarfiuvoq.