Siumut ilinniartitsisussaaleqineq pillugu: Utoqqalinersiuteqalertussanut immikkut nutaamik isumaqatigiissusioritsi

Ilinniartitsisussaaleqineq annikillisarneqassappat taava sulisitsisut IMAK-ilu immikkut utoqqalinersiuteqalertussanut isumaqatigiissusiortariaqarput. Utoqqalinersiaqalertussat sivisunerusumik ilinniartitsisinnaaniassammata. Partii illuatungiliuttoq annersaat taama isumaqarpoq.

Nunatsinni ilinniartitsisussaaleqineq ukiuni aggersuni annertunerulersinnaavoq. Tassami ilinniartitsisut 300-t 500-llu missaaniittut utoqqalinersiuteqalernissaminut qanilliartorput. Nunatsinni ilinniartitsisussaaleqineq eqqarsaatigalugu Siumumi ilinniartitaaneq pillugu oqaaseqartartoq marlunnik tigussaasunik siunnersuutissaqarpoq.

- Allatut iliuuseqartoqarsinnaanngippat taava aqqutissatuaq tassaasorinarpoq massakkut utoqqalinersiaqalertussat utoqqalinersiaqartullu immikkut neqerooruteqarfigineqarsinnaanerat. Ilinniartitsisussaaleqinerup annertusiartuinnarnera isiginngitsuusaarsinnaanngilarput, Siumumi ilinniartitaanermi oqaaseqartartoq, Doris J. Jensen oqarpoq.

Immikkut isumaqatigiissusiortoqassappat IMAK qanimut suleqatigineqassasoq, taassuma naqissuserpaa.

Joint Committee atorluarneqartariaqarpoq

Kujataani ilinniartitsisussaaleqineq annertoorujussuuvoq. Kommunip illoqarfigisaani ilinniartitsisut 23-t amigaatigineqarput, nunaqarfinnilu aqqaneq-marluk amigaatigineqarlutik. IMAK-ip siulittaasuata kujataani ilinniartitsisussaaleqineq ilisarisinnaalluarpaa ilinniartitsisunngorlaallu qaffasinnerusumik ilinniaqqinniarlutik aalajangertartut erseqqissaatigalugu. Atuarfinnimi sulineq ilinniartitsisunngorlaanut sakkortusinnaammat.

Nanortallip atuarfiani oqaasilerinermi ilinniartitsisut amigaataanerupput. Danskisut ilinniartitsisoq ataasiuvoq, tuluttut ilinniartitsisoq alla tikeqqammerpoq. Maannalu atuarfimmi tuluttut ilinniartitsisut marlunngorlutik. Meeqqanut 168-inut fysikimi ilinniartitsisoq aamma kisimiippoq.

Naalakkersuisut annertunerusumik Joint Committee atorluartariaqaraat, Doris J. Jensen isumaqarpoq. Joint Committee tassaavoq USA Kalaallit Nunaallu akornanni suleqatigiinerunissamik isumaqatigiissut. Isumaqatigiissummi ilaatigut USA-mi Nunatsinnilu innuttaasut atanerulernissaanut immikkoortuni sisamini anguniagaqartoqarpoq, ilaatigut kulturikkut suleqatigiineq ilinniartitaanerlu isumaqatigiissummi anguniarneqarlutik.

- Ilinniartitaanermut Naalakkersuisumut kaammattuutigaara nunat tuluttut oqaluffiusut isiginiarneqarnerunissaat. Nalunngilara Canada aamma USA tuluttut ilinniartitsiartortarnissaminnut soqutiginnittut, Doris J. Jensen oqarpoq.

USA-mut Canadamullu tuluttut ilinniartitsisinnaanerup saniatigut Ilisimatusarfimmi naammassisartut aamma qiviarneqartariaqalersut Siumup ilinniartitaanermut oqaaseqartartuata oqaatigaa.

- Ilisimatooqarpoq atorfissaaleqisunik. Immaqa taakkua aamma immikkut isumaqatigiissuteqarfigineqarsinnaapput. Finlandimi meeqqat atuarfiini qaffasissumik ilinniagallit ilinniartitsisutut atorneqartarput, Doris J. Jensen naggasiivoq.

Powered by Labrador CMS