naalakkersuisooqatigiilertut
Siumut IA aamma Partii Naleraq naalakkersuisoqatigiilerput
Partiit naalakkersuisoqatigiit Siumut, Inuit Ataqatigiit aamma Partii Naleraq tusagassiortunik katersortitsilersut, Siumut tusagassiuutinut nalunaarummi ilisimatitsivoq
Atassut aamma Demokraatit naalakkersuisooqatigiinnit anisitaapput.
Partiit taakku partiinit illuatungiliuttunit Inuit Ataqatigiinnit aamma Partii Naleqqamit taarserneqarput.
Partiit naalakkersuisoqatigiilersut Siumut, Inuit Ataqatigiit aamma Partiit Naleraq nalunaaqutaq 09.15 tusagassiortunik katersortitsissasut, Siumut tusagassiuutinut nalunaarummi allappoq.
Tupaallaataanngitsoq
Suleqatigiikkunnaarnerat annerusumik tupaallaataanngilaq, tassami naalakkersuisooqatigiit suleqatigiinneranni pingaartumik ajornartorsiortoqarnera ilisimaneqarmat, taamatullu Naalakkersuisut siulittaasuata Kim Kielsenip Inuit Ataqatigiit naalakkersuisoqatiginissaanik periarfissanik ujartuinikuummat.
Atuaruk: Kielsenip ajornartorsiorneq pillugu: Suleqatigiinneq nalilersuleruttorparput
Aningaasanut inatsit
Naalakkersuisoqatigiilersunut suliassat annertupput. Minnerunngitsumik aningaasanut inatsit nutaaq inissinneqassaaq, maanna politikkikkut aallaavik allaaninngorpoq, Demokraatit siulittaasuat, Randi Vestergaard Evaldsen suliami peqataajunnaarmat.
Kiffartuussinermut isumaqatigiissutit
Angallannermut tunngatillugu kiffartuussinermut isumaqatigiissutit pillugit pisut aaqqiiviginissaat suliassat pingaartut ilagaat. Tassani politikkikkut Atassutip siulittaasua, Knud Kristiansen akisussaasuugaluarpoq.
Atuaruk: Kiffartuussinermut isumaqatigiissutit nuna tamakkerlugu akerliuffigineqalersut
Nuna tamakkerlugu pilersaarut
Politikkikkut naalakkersuisooqatigiilertut arlalitsigut isumaqatigiiffeqarput, assersuutigalu namminersulivinnissamut apeqqut aamma inuiaqatigiinnut minnerusunut annerusunullu tunngatillugu ineriartorneq naligiinnerusoq. Tassunga tunngatillugu assersuutigalugu nuna tamakkerlugu pilersaarummi akerleriissutaasoq tunuartinneqartoq, saqqummiuteqqinneqannginnerani politikkikkut malunnaatilimmik allanngortinneqarnissaa qularnanngilaq.
Uran
Illuanilli aamma isumaqatigiinngissuteqarput, minnerunngitsumik uranisiornissamut tunngatillugu, Siumut tassani angertuupput, partiillu sinneri marluk sakkortuumik isornartorsiuisuullutik.
Naalakkersuisooqatigiit nutaat patajaatsumik amerlanerussuteqalissapput, Inatsisartut 31-iusuni 24-it tunuliaqutaassapput. Partiit anginerit marluk tamarmik 11-nik qinigaatitaqarput, Partii Nalerarlu marlunnik.