Siumut folketingimut sisamanik qinigassanngortitaqarpoq
Kikkut folketingimut qinigassanngortissanersut pillugit Siumut siulersuisuuneri isumaqatigiipput.
Nutarterneqarpoq nal. 14:05
Siumut siulersuisuuneri martsip sisamaanni ataatsimiinnerminni Folketingimut qineqqusaarnermi sassartussanik aalajangerput.
- Ineqi Kielsen, Nuuk
- Ulrikka Holm, Nuuk
- Aki Mathilda Høegh Dam, Nuuk
- Jens-Erik Kirkegaard, Ilulissat
Siumut siulittaasuata Kim Kielsenip tusagassiorfinnut kaammattuutigaa, folketingimut qineqqusaartitsineq
torersumik ingerlatissagaat.
Naalakkersuisuusimasoq
Qinigassanngortittunit sisamaasunit Jens-Erik Kirkegaard politikkikkut suliaqarnermi misilittagaqarnersaavoq ilaatigut aatsitassarsiornermut naalakkersuisutut issiasimagami. Inatsisartunut apriilimi 2018-imi qinigassanngortinngilaq. Tassani oqaluttuarpoq politikkimik suliaqarneq qimanniarlugu ilaquttani inuussutissarsiornerlu pillugit. Jens-Erik Kirkegaard folketingimut qinersinermut 2015-imi qinigassanngortikkaluarpoq. Tassani Siumumi qinigassanngortittuni taajuunneqarnerit tulliattut inissippoq, 1.467-init taaneqarluni, Aleqa Hammond 3.759-init taaneqartoq.
Maanna Aleqa Hammond unammeqqittussanngorpaa, maannali parteeqatigiinnatik.
Siumut iluani folketingimut qinigaasinnaasut inuusunnerit pingasut allat aamma sassarput.
Ineqi Kielsen qinigassanngortilluni sassarnini qangali nalunaarutigereerpaa. Taanna Siumut Inuusuttunut Suleqatigiiffiani suliaqartareerpoq. Inatsisartunut qinersinermi kingullermi 108-nit taajuunneqarpoq.
Ulrikka Holm sexologitut ilisimaneqarneruvoq, tusagassiutinilu immikkut ilisimasalittut oqallissaarisutullu sassartareersimalluni. Politikkimik suliaqarumalluni siorna upernaakkut sassaqqaarpoq Inatsisartunut qinersinermi qinigassanngortilluni, 75-nnarniilli taajuunneqarluni.
Aki-Matilda Høegh-Dam Københavns Universitetianni Statskundskabimi (Naalagaaffiit pissusiinik ilisimatusarneq) bacheloritut naammasseqqammerpoq. Taanna Siumut Inuusuttunut Suleqatigiiffiani ukiaq siulittaasutut sassaraluarpoq, Inuk Kielsen Fleischerili taaneqarnerpaallu siulittaasunngorluni. Danmarkimi ilinniarnermi nalaani oqallinnerni peqataangaatsiartareerpoq, piaartumillu namminiilivinnissamut akuersaartuulluni nalunaarutiginnereersimalluni.