Siumut: Canadami pisimasoq alianartoq ullormi misiginneqataanermik takutitsiffiuli

Canadami meeqqat 200-nik amerlanerusut timaannik nassaarsimaneq ullormi aalajangersimasumi misiginneqataanermik takutitsisoqartariaqarpoq, taamatut isumaqarfpoq Siumut siulittaasuat Erik Jensen.

Oqaluttuarisaanermi pisimasoq kanngunartoq.

Siumut siulittaasuat Erik Jensen, Canadami Kamloops Indian Residential School-ip eqqaani meeqqat 215-it saarnginik sapaatip akunnerani kingullermi nassaartoqareersoq, Canadami nunap inoqqaavisa meerartaannik pinnittarsimaneq pillugu taamatut oqarpoq.

- Oqaluttuarisaaneq alianartoq nunasiaatillit inoqamminnut ilaatigut inuttulluunniit isiginngisaminnut ajornerpaamik ataqqinannginnerpaamillu kanngunartuliorfiginnissimanerat pillugu akuersaanngilluinnarnerput maanna apuukkusupparput, Erik Jensen tusagassiorfinnut nalunaaruteqarluni allappoq.

Meeqqat nassaarineqartut ilaat pingasuinnarnik ukioqarput, nassaarsimanerlu Canadami annertuumik tupaallatsitsisimavoq.

Maani nunami partii naalakkersuisuutitaqartoq Inuit Ataqatigiit marlunngormat qisuariarluni Canadami nunp inoqqaavinut misiginneqataanerminik nalunaaruteqarpoq.

Siummersoq Erik Jensen isumaqarpoq, ullormi aalajangersimasumi misiginneqataanermik takutitsisoqartariaqartoq:

- Naalakkersuisutigoortumik nuna tamakkerlugu ullormi aalajangersimasumi misiginneqataanitsinnik takutitsisariaqarpugut, Erik Jensen allappoq.

'Arlalippassuartigut assigiimmik oqaluttuassartaqarneq'

Erik Jensenip siunnersuutini Sermitsiaq.AG-mut ima tunngavilersorpaa:

- Tamanna pingaaruteqarpoq, uagummi nammineq nunasiaataasimavugut namminiilivinnissarlu siunnerfigalugu ingerlalluta. Canadamiut qaninnerpaatut naggueqatigaavut, arlalippassuartigullu assigiimmik oqaluttuassartaqarluta. Nunat inoqqaavinik naqisimaninneq akuersaanngilarput.

- Taamaammat uagutsinnut Kalaallit Nunaanneersunut pingaaruteqarpoq, eqqaamiutsinnut misiginneqataanermik ataqqinninnermillu takutitsinissarput, Erik Jensen oqarpoq.

Ullormi sorlermi misiginneqataanitsinnik takutitsissanersugut Naalakkersuisut aalajangissavaat, taanna oqarpoq, siunnersuutigaali ulloq misiginneqataanermik takutitsiffissaq piffissami qaninnerpaami pisariaqartoq.

ICC: Paavi utoqqatsertariaqarpoq

Kattuffik ICC aamma pingasunngormat amiilaarnaqisumik meerarpassuit timaannik nassaartoqarsimanera pillugu qisuariarpoq.

ICC Nunap Inoqqaavinut eqqugaasunut misiginneqataanerminnik nalunaaruteqarpoq, aamma paavip Canadami nunap inoqqaavisa meerartaasa atuarfinni pineqartarsimanerat pillugu utoqqatseqquneqarneranut ICC tapersersuivoq.

ICC-p Siulittaasua Dalee Sambo Dorough Alaskameesoq imatut oqarpoq:

- Qularissanngilarsi Inuit tamattaalluta qanoq ilumut pisoqarsimaneranik paasiniaallusi ilungersornissinni tapersersussagassi. Canadami tamarmi atuarfinni najugaqarfiusimasuni meeqqanik tammaaneqartunik paasiniaanermut Canadap Naalakkersuisui aningaasalersueqqullugit piumaffigineqarnerannut tapersersuivugut eqqortoq
paasineqaqqullugu inaarsisutullu misigisoqaqqullugu..

- Canadami atuarfinni najuaqarfiusuni eqqugaasimasunut utoqqatseqqullugu kiisalu allagaatit Kamloopsip eqqaani Canadamilu tamarmi atuarfinni najugaqarfiusuni allani atuarfiit najugaqarfiusut eqqaani meeqqat ilerrisa kikkuussusersiniarneqarnerini atorneqarsinnaasunik saqqummeeqqullugu Pave Francisip piumaffigineqarneranut tapersiiumavugut, siulittaasoq oqarpoq.

Powered by Labrador CMS