Siumut ataatsimeersuarnissaat digitalimik ingerlanneqassaaq
Siumut Ilulissani ataatsimeersuarnissaa atortussaajunnaarpoq. Nunali tamakkerlugu ataatsimeersuarneq attaveqaatit atorlugit ingerlanneqaannassaaq.
Siumut aasamut siulittaasussaminik toqqaasussanngorpat, ataatsimeersuarneq digitalimik ingerlanneqassaaq.
Partiip allattaanera Miki Jensen Sermitsiaq.AG-mut uppernarsaavoq.
Covid-19-imik ajornartoorneq pissutigalugu nuna tamakkerlugu ataatsimeersuarnissaq allatut ingerlanneqassasoq Siumup siulersuisuunerisa aalajangerpaat, Siumut tusagassiuutinut nalunaaruteqarluni allappoq.
Nuna tamakkerlugu ataatsimeersuarnissaq Ilulissani 8. - 10. juli ingerlanneqartussagaluartoq taamatillugu, ataatsimiinneq Nuummit aallaaveqartussanngussaaq. Takkullutillu peqataasut ikinnerussallutik. Ataatsimeersuarnermi peqataasut oqarasuaatikkut isiginnaarutikkullu peqataatinneqarumaarput.
Oqaluuserisassat pingaarnerit ilagissavaat siulittaasussamik qinersineq, siulersuisuunernullu ilaasortassanik qinersineq. Ataatsimeersuaqataasut najuutinngikkaluarlutik qinersinissamut periarfissaqassapput.
- Covid-19-p kingunerisinnaasai eqqarsaatigalugit partii taama aalajangertariaqalersimavoq. Covid-19 juulimi suli ajornartorsiutaasinnaanera ilisimanngilarput. Nuna tamakkingajallugu, illoqarfinniit nunaqarfinniillu ataatsimeersuariartoqartussaagaluarpoq taamaattumik immikkut iliuseqarnikkut mianersortariaqarpugut. Ataatsimeersuarnissaq isiginnaarutikkut oqarasuaatikkullu ingerlanneqarnissaa illersorneqarsinnaanerusumik aaqqiinerussaaq, partiip allattaanera Miki Jensen oqarpoq.
Oqallisissat kinguartinneqarput
Ukiunut tulliuttunut partiip anguniagai pillugit oqallinnissaq 2021-p aasaanerani ingerlanneqartussanngorlugu kinguartinneqarpoq.
Siulersuisuunerit, immikkoortortaqarfiit, Siumup Inuussuttai, borgmesterit aamma partiip Inatsisartunut ilaasortaatitai, Naalakkersuisuutitai, Folketingimilu ilaasortaatitaa Ilulissani peqataanissamut qaaqquneqassapput. Naapisimaarnissami partiip anguniagaanik itisilerillutik oqallinnissamut periarfissaqassallutik.
- Partiimi oqartussaaqataanerup attatiinnarneqarnissaa immikkoortortaqarfiillu tamarmik oqaaseqarsinnaatitaanerat pingaaruteqartoq siulersuisuunerit isumaqarput. Taamaattumik aappaagu Siumut isumasioqatigiissitsissaaq najuulluni suut anguniarneqassanersut oqallisigineqassallutik, Miki Jensen oqarpoq.