Siumut allattaanissarsiorpoq
Nunatsinni partiit illuatungiliuttut annersaat, Siumut, Miki Jensenip soraarnerata kingorna allattaanissarsiorlutik aallartipput.
Siumut allattaanissarsiorluni atorfinitsitsiniarluni nittartakkamini nalunaaruteqarpoq.
Allattaanissarsiornermi Siumut allappoq allattaanerup suliassaasa ilagigaat immikkoortortaqarfiit ataatsimullu siulersuisut ingerlaavartumik peqataatinneqarnissaat, ataatsimeersuarnernik piareersaanerit aamma partiip avammut kiinnertarnera tusagassiutitigoortittarneralu nukittorsarnissaat.
Partiimi allattaanertut atorfimmut qinnuteqarnissamut soqutiginnittut eqqumaffigisariaqarpaat pingaartinneqarmat periusissiornermik pikkorissumik, aningaasanik ingerlatsinermik misilittagalimmik, kalaallisut oqallorissumik aamma suliffeqarfimmi siuttuunermik misilittagaqartumik partii ujaasimmat.
Atorfik inuttassarsiuussaq uani atuarsinnaavat.
Allattaanissarsiornissamut piffissanngorpoq
Siumut siulittaasua, Erik Jensen Sermitsiaq.AG-mut ilisimatitsivoq partiimi allattaasimasup Miki Jensenip januarimi soraarneranit allattaanissarsiornissamut aatsaat piffissaqartoqalertoq. Ilaatigut ataatsimeersuarnerit aamma qinersineq annertuumik piffissartorfiusimapput.
Partiip allatserisimasaa, Miki Jensen, januarimi soraarpoq, ilaquttani piffissaqarfiginerujumallugit tunngavilersuilluni.
Allattaanissarsiornissap tungaanut siunnersorti Jenseeraq Poulsen allattaanerugallartutut atorfeqarpoq. Ukiup affaa kingulleq suliassaaleqiffiusimanngitsoq ajunngivissumillu ingerlasimasoq, taanna Sermitsiaq.AG-mut ilisimatitsivoq. Qinnuteqarnissarli pillugu eqqarsaatersornissamut suli killissimanani ilisimatitsilluni.