Siumut akerliusoq: NCD-p Iserimmut kattunniarneqarnera naammaginartumik nassuiarneqarsimanngilaq

Kommuneqarfik Sermersuumi ineqarnermut atatillugu ingerlatsisimanerup misissuiffigineqarsimanerata takutippaa, kommuni ineqarnermik ingerlatsinermini annertoorujussuarnik ajornartorsiuteqartoq - isornartorsiorneqartut arlallit kommunip illoqarfimmik ineriartortitseqatigiiffianut Nuuk City Developmentimut (NCD) tunngassuteqarput.

Ataasinngornermi saqqummiunneqarpoq, kommunimi ingerlatsiviup borgmesterillu siunnersuutigisimagaat, NCD atorunnaarsillugu kommunip inissiaatileqatigiiffiutaanut Iserimmut kattunneqassasoq. Tamanna pissaaq NCD-p inissiaataasa Iserimmit tiguneqarnerisigut, aamma ingerlatseqatigiiffiup atuarfilioneq ulluuneranilu paaqqinnittarfiliorneq kommunimi tnamminermit tiguneqassasoq.

Siunnersuut kommunip aningaasaqarnermut ataatsimiitaani matoqqasumik suliarineqarsimavoq. Ataatsimiinneq pisimavoq borgmesterip nalunaaruteqanngitsiarnerani.

Kommunimi politikkerip aamma kommunimi aningaasaqarnermut ataatsimiititami ilaasortap Inga Dora G. Markussenip periuserineqartoq naammaginngilaa, aamma NCD-p Isermimmut kattunneqarnissaanik pilersaarutit toqqissisimanarinngilai.

Ammanerusumik ingerlatsisoqarnissaanik kaammattuisoq

Politikkerip Siumut Nuup Facebookiatigut kaammattuutigaa, borgmesteri paasissutissanik amerlanerusunik saqqummiissasoq:

- Siumumit taamatut oqariartuuteqarnitsinni kajumissaarutigissavarput NCD pillugu immikkoortoq tamakkiisumik avammut saqqummiunneqassasoq ataatsimiinnermi imaqarniliaq ilanngullugu.

- Kommuni annertuumik ilungersunartorsiortussaavoq akileraartartut aningaasaataannik amerlaqisunik akeqartussamik, politikkeri allappoq.

Siumut oqaluuserineqartumut ikinnerussuteqartutut oqaaseqarsimavoq, tassanilu ilaatigut allassimavoq:

- Siumumit akuerinngilarput NCD Iserimut kattunneqassasoq saqqummiunneqartut tunngavigalugit, iluamik nassuiarneqarsimatinnagu ingerlatseqatigiiffiup aqutsisuisa siulersuisuisalu suliap ineriartornerani akisussaaffiat suunersoq.

Sanaartornerit tapersersoraat

Sermitsiaq.AG-mit Inga Dora G. Samuelsenimut apeqqutigineqarsimavoq, kommunip NCD-mut atatillugu saliinera sooq akerlerineraa. Politikkerilu tassunga imatut akissuteqarpoq:

- NCD-p paaqqinnittarfiliorlunilu atuarfiliornera akueralutigulu tapersersorparput. Susoqarsimanersorli saqqummiunneqartariaqarpoq. Qanoq ililluni taamatut aalajangiisoqarsinnaasimava. Aqutsisut naak, siulersuisut naak, Inga Dora G. Markussen aperivoq.

Ingerlatsisimanermik misissuisoqarnerani Deloittemit ingerlanneqartumi, kommunip nutaamik Nuummi atuarfiliorneq ataasiartumik akilersinnaaneraa apeqquserneqarsimavoq. Kommunip maanna suliaq NCD-mit tigusimalerpaa, akiligassarsiffiusinnaasunillu isumaqatiginninniarluni.

Borgmesteri: Torersaaleruttorpunga

Borgmesterip Charlotte Ludvigsenip oqaatigaa, NCD matuneqartoq, aningaasalersuinissamut periarfissat allanngorsimammat aamma ammanerusumik ingerlatsisoqarnissaa qulakkeerniarlugu:

- Siunissami sanaartornermik pilersaarutit kommunalbestyrelsip missingersuutaatigut isumaqatigiissutigineqartassapput taamaalilluni innuttaasunit tamanit takuneqarsinnaassaaq aningaasat sumut atorneqartarnersut, borgmesteri kattussinissamik siunnersuut pillugu ataasinngornermi unnukkut allappoq.

Borgmesteri naapertorlugu, taamatut iliuuseqarnermut uppernarsaataasoq ingerlatsivimmi torersaaleruttorneranut.