siulittaasunngorniuunneq
Siumut ajornartorsiorfimmini nukittunerpaasarpoq
Immikkut ataatsimeersuarnerup aallartinnerani Siumup siulittaasorigallagaa ammaanersiorluni oqalugiarnermini misigissutsinik eqquiniaasorujussuuvoq
– Nunatta erfalasua kusanartoq assigalugu Siumut ajornartorsiorfimmini nukittunerpaasarpoq. Ajornartorsiorfitsinni nukittunersaasarpugut ataqatigiittarlutalu, Jørgen Wæver Johansen oqarpoq, ataatsimeersuartunillu ersaattaanneqarujussuarluni.
Jørgen Wæver Johansenip aamma parteeqamminut assani isaappaa oqarluni:
– Partiit akimorlugit sorpassuarnik suleqatigiiffigisinnaasaqarpugut. Tamatta immitsinnut atorfissaqartippugut, Jørgen Wæver Johansen erseqqisksaavoq. Taavalu saammaassinissaminut piareersimavoiq.
– Puigussanngilarpuit inuinnaagatta. Ilaanneeriarluta kukkusarpugut, ilaannikkut piaarinata. Aleqa Hammond sulilluarsimaninnut qujanaq. Siunissami pitsaanerpaamik kissaappatsigit.
Jørgen Wæver Johansenip assani illua'tungiliuttunut isaateqqippaa, Kuupik Kleistilu qutsavigalugu, siunissamilu ingerlalluarnissaanik kissaallugu.
Siumut 2014-17-imut politikkikkut programmia akuersissutigineqarpoq. Oqallisigineqangaatsiareernerata kingorna.
KIkkut tamarmik siulittaasumut qinersinissaq aammalu Lars-Emil Johansen kajumissaarneqarnermi kingorna qinigassanngortissanersoq pissanngatigaat.
Matuma allannerani siulittaasumut qinigassanngortittut suli pingasuupput: Kim Kielsen, Nick Nielsen aamma Doris Jakobsen.
Taasisinnaasut 66-iupput. Aleqa Hammond aamma taaseqataasinnaavoq. Sulili ataatsimeersuarnermut takkutinngilaq.