Siumut erseqqissaassuteqarpoq Sermitsiaq.AG suliffeqarfimmit tikeraarneq pillugu allaaserisaqareersorlu, tamatumani ssani ETM politikkikkut partiinik assigiinngitsunik, ilaatigut Siumumik, oqaloqateqarsimanerarmat.

Siumu´p erseqqissaatigaa, partiip ETM-illu Kalaallit Nunaannut tikeraarnerata nalaani pisortatigoortumik attaveqatigiittoqarsimanngitsoq imaluunniit ataatsimeeqatigiittoqarsimanngitsoq. Siumup erseqqissaatigaa, ETM-ip avammut nalunaarutaa kukkuneqartoq, Siumullu tungaanit oqaloqatigiinnernut peqataasoqarsimaneraaneq tunngavissaqanngitsoq.

- Siumup erseqqissassavaa, partii oqaloqatigiinnernu tamakkununnga peqataasimanngimmat, aamma ETM-ip avammut nalunaarutaa kukkuneqarmat, oqaloqatigiinnernullu taakkununnga peqataasimanerarneqarnerput ilumuunngilluinnarmat, Siumumit oqaatigineqarpoq.

Kikkut aatsitassarsioqatigiiffimmik oqaloqateqarsimappat?

Siumup pisortatigoortumik nalunaarutini paasissutissat eqqortuunissaata pingaaruteqassusia erseqqissaatigaa, kukkusumillu paasissutissiinerup politikkikkut tutsuiginassutsimik tusaamaneqarnermillu innarliisinnaanera erseqqissaatigalugu.

ETM-ip kingorna Siumumut nammineq uppernarsarsimavaa nalunaarutertik kukkuneqartoq tamannalu paatsuunganartoqarsimappat utoqqatsissutigalugu. ETM naapertorlugu kukkusumik paasissutissiineq Perthimi qullersaqarfimmi paatsuunganermik pissuteqarpoq.

Siumut naapertorlugu ETM-imit Siumumut akissut imaappoq:

- Qujanaq ETM-ip tamanut emailianut paasiniaagavit aamma qanittukkut ilisimatitsissuterput pillugu paatsuunganartoqarsimappat tamanna utoqqatsissutigaara. Qanittukkut Nuummiitilluta arlaat Siumut attuumassutilik ataatsimeeqatigisimavarput, kisianni pineqartoq aqutsisunut ilaanngilaq. Avammut ilisimatitsissutitsinni Perthimi qullersaqarfitsinniit paatsuunganeq pilerpoq, aamma tamanna kukkussutigeqqinneqarnavianngilaq. 

Sermitsiaq.AG-p ETM-ip kimik Siumumut attuumassutilimmik naapeqateqarsimanera paasiniarniarsaraa.

Naalakkersuisut ETM-illu akornanni taarsiissuteqartitsiniarnermik suliaq

Siumup tusagassiuutitigut nalunaarutimi erseqqissaatigaa, suliffeqarfiit politikkimillu ingerlatsisut attaveqaqatigiinnerminni eqqoqqissaartumik nalunaaruteqartarnissaat pingaaruteqarluinnartuusoq, kaammattuutigalugulu ETM oqaloqatigineqassappat tamanna Naalakkersuisutigoorlugu ingerlanneqartussaasoq.

Pingaaruteqarpoq maluginiassallugu partii Siumut ETM-ip aamma Naalakkersuisut Danmarkillu naalagaaffiata akornanni Kuannersuarni aatsitassanik piiaanissaq pillugu inatsisitigut saqitsaannerannut maanna ingerlasumut akuunngimmat.