suliffiit
Siumut: Aalisakkat avataaneersunit aalisarneqartartut ikilisariaqarput
Avataanit nunatta imartaani aalisartartut annikinnerusumik pisassinneqartalernissaat Saxdorph Didriksen Siumut siunersuuteqarpoq
Inatsisartunut ilaasortaq Saxdorph Didriksen siunersuuteqarpoq, avataanit aalisariartut annikinnerusumik pisassinneqartalissasut.
Naatsorsueqqissaartarfiup kisitsisaataani inuit 4.954-it suliffissaaleqisuusut takuneqarsinnaavoq. Avataanit aalisartut nunatta imartaani aalisartartut annikinnerusumik pisassinneqartalernissaat siunersuutigaa.
- Norge ukioq 2014 mi 3885 tonsinik paarlaasseqatsigiinnerminik nunatta imartaani pisassaqarpoq, Rusland ukioq manna 5000 tonsinik aamma paarlaasseqatsigiinnermik isumaqatsigiissutaareersunik pisassaqarpoq aammalu EU-mut aalisakkat assigiinngitsut 25.765 tons taakkua saniatsigut ammassaat 60.000 tonsit aalisagartassanik isumaqatigiissuteqartarpoq, taakkuali nunatsinnut umiarsualivitsinni usingiarneq ajorput, Saxdorph Didriksen oqarpoq.
Kalaallit Nunaanni suliffissanik pilersitsisoqarsinnaasoq isumaqarpoq, aalisakkat tonsit arlaqartut nunanut allanut annissorneqartarunnaarpata.
- Taamaattumik qulaani pisassiissutsigineqartut nunatta umiarsualiviani usingiarneqartalernissai anguniarneqartariaqarpoq taamaalilluta aamma nunatsinni suliffinnik pilersitsinissarput qulakkiissavarput ukiuni makkunani suliffisameerluta isiginngitsuusaaginnarsinnaanngilagut nunatta pisuussutit uumassusillit nunanut allamiunut suliassanngortsinneqarneri. Namminermi nunatta aalisartuinut pisassaritsinneqartut saniatsigut nunatsinni tunisassiornikkut siuarsaanissatsinnut aqqutissaalluartut ilagivaat qulaani nunanut allamiunut pisassiissutsigisartakkavut, Saxdorph Didriksen oqarpoq.