Siumut: - Aalisagaateqarluarpugut

- Piffissami kingullermi ukiumut tulliuttumut Naalakkersuisut aalisagartassanik aalajangiinerat
”sajuppillatitsilaartoq” Siumumiik maluginiarparput, Siumup oqaaseqartartua Jess Svane tusagassiuutinut nalunaarummi ilaatigut allappoq.

Aalisartut piarniartullu kattuffiata KNAPK-p Nunarsuarmilu pinngortitaq pillugu sulianiaqatigiiffissuup WWF-p Naalakkersuisut Qeqetarsuup Tunuani 9.200 tonsinik qaleralittassiinerat isornartorsiorpaat. Tunisat 2016-imut sanilliullugu ikileriarsimaneri tunngavilersuutigalugu.

Atuaruk: KNAPK: Qineqqusaarutaannaavoq

Tusarniaasoqassaaq

Aalisagartassiissutit aalajangersarnissaannut tunngatillugu atuisut tusarniarneqarnissaat, partiimut pingaaruteqarluinnartuusoq, Siumut erseqqissaavoq.

- 2018-mullu tunngatillugu Naalakkersuisut taamaaliorput. Tassalu tusarniaareernermi KNAPK-p nammineerluni akissuteqaataani takuneqarsinnaavoq Qeqertarsuup tunuani 10.000 tons qaleralittassiissutigineqarnissaat innersuunneqartut. Taamatut innersuussuteqarsimaneq asuliunngitsoq ilimagilluinnarparput, Jess Svane (S) oqarpoq.

KNAPK innersuussutinut nassuiaasoq

Siumup tusagassiuutinut nalunaaruteqarnerata kinguninngua, kattuffimmiit sooq Qeqertarsuup Tunuani 10.000 tonsinik aalisagartassiisoqarnissaa innersuussutaasimanersoq, KNAPK-mit nassuiarneqarpoq.

- Killeqanngitsumik aalisartitsiviit atorunnaarsinneqarsissaat piumasarigatsigu, taamaammallu killeqanngitsumik aalisartitsiviit atorunnaarpata pisassiissutit aaqqiivigineqartariaqarlutik, KNAPK-mi siulittaasoq Henrik Sandgreen oqarpoq nangillunilu:

Assigiimmik ingerlatsinissamik ujartuineq

Angallatit (6 meterimiit takinerusut) umiatsiaaqqallu (6 meterimiit naannerusut) tamarmik niiverutaasinnaasunik pisassaateqartinneqalernissaat kissaatigigatsigu. Umiatsiaaqqat IOK-nik (Ataasiakkaat niuerutaasinnaasunik pisassinneqarneri) pisassaqalerpata akilersinnaasumik aalisarsinnaasariaqarput, akuersissutillu tunniunneqarsimasut amerlassusii eqqarsaatigalugit allatut ajornartumik pisassiissutitigut aaqqiivigineqartariqarlutik.

Assiigiissakkamik, eqaatsumik malinneqarsinnaasumillu aqqutsineq ujartorlugu, KNAPK-p erseqqissaatigaa.

Innersuussutit uggorineqartut

"Tunitsivinnut tunisaasimasut kiserluinnaasa aallaavigalugit aalisagartassiinissamik innersuussuteqartoqarnera", Siumumiit uggorineqarpoq.

- Aammalu qaleralinniartartorpassuit saarulliit annertuumik takkunneranni saarullinniarnerat qiviartariaqarpoq, tassami 9.000 tons angullugit qeqertarsuup tunuani tunineqarput, avannarpasinnerusumilu aamma taama takkusimaartigingaluartut tunitsivissaqanngimmata atorneqanngillat, Jess Svane oqarpoq.

Aalisagartassiissutinik agguaaneq naammagisimaarneqartoq

Naak naalakkersuisooqataasut Inuit Ataqatigiit aappaagumut sinerissap qanittuani qaleralittassiissuutinut isumaqataanngikkaluartut Siumumit naammagisimaarinnittoqarpoq. Inuit Ataqatigimii killiligaanngitsumik aalisarfiusoq Qeqertarsuup tunuaniittoq atuukkunnaassasoq piumasaqaatigaat.

- Nuna manna ataqqillugu aalisarnikkut aalisakkeriveqarnikkullu ineriartortittuartariaqarpoq, taamaammat Naalakkersuisut tamarmiusut sinerissap qanittuani aalisagartassiinerat Siumumiit iluarisimaarparput piviusorsiortutullu isigalugu, Siumut allappoq.

Atuaruk: Qaleralittassiissutigineqartut WWF-p isornartorsiorpai