Siumut aalajangiusimavoq: Pisortaq peertariaqarpoq

Illoqarfiit pigaarnersaata kommuniani kommunaldirektør Lars Møller-Sørensen atorfimminit peerneqartariaqarpoq, gruppip siulittaasua Peter Davidsen ilisimatitsivoq. Taassuma neriuutigaa kommunalbestyrelsemi ataatsimiinnermi tullermi amerlanerussuteqartut tatiginnginnerminnik nalunaaruteqassasut.

Kommunaldirektøri maanna issiasoq pillugu tatiginnikkunnaarnermik nalunaarutini Peter Davidsenip sapaatip akunnerani kingullermi tunniuppaa, tatiginnikkunnaarnermut tunngavilersuutigineqartut tallimaapput.

Tatiginninnginnermut isornartorsiutit tallimat

Siumup isornartorsiuinera Aningaasaqarnermut Inuussutissarsiornermullu ataatsimiititami sisamanngormat ataatsimiissutigineqarpoq, isornartorsiutigineqartut ataasiakkaarlugit aqutsisoqarfimmit illuatungilerneqarlutik, politikkikkut suliat qanoq ingerlasimaneri innersuussutigineqartarlutik.

Isornartorsiorneqartut pillugu aqutsisoqarfiup akinera

Siumut aqutsisoqarfimmi pisortaanermik isornartorsiuinera, IA tunuliaqutaralugu borgmesterinngoqqammertumit, Charlotte Ludvigsenimit Demokraatillu sinnerlugit ilaasortamit Justus Hansenimit illuatungilerneqarpoq, aqutsisoqarfimmi atorfilik isornartorsiorneqarnera tunngavilersuutigineqarluni.

Suli nangaarianngilaq

Peter Davidsenili ernumassutissaqanngilaq Sermitsiaq.AG-mullu ilisimatitsilluni Aqutsisoqarfiup isornartorsiuinerit pillugit akissuteqaatai kommunaldirektørip iperagaanissaanut naammanngitsut.

- IT pillugu suliamut tunngatillugu oktobarip 14-ani 2014-imi suliaq pillugu saqqummiiffigineqarpugut, neriorsuutigineqarluni suliaq allanut tunniukkutsigu ukiumut 3 milliuunit koruunit tungaannut sipaarsinnaasugut. Maanna ukiut arlallit qaangiussimalerput, IT-milli atuinitsinnut aningaasartuutit maanna pingasoriaataa sinnerlugu amerlanerupput. Tamanna akuerineqarsinnaanngilaq, Peter Davidsen oqarpoq, isornartorsiuinerlu alla oqaaseqarfigalugu:

- Kommuni 2014-imi Namminersorlutik Oqartussanit sakkortunerusumik nakkutigineqalerpoq. Taama pisoqaqqinnginnissaa anguniarlugu aalajangerpugut naatsorsuutit pillugit ammanerusumik sulissalluta, qaammatikkuutaartumik naatsorsuutaagallartartut takutittassallugit. Aningaasaqarneq pillugu suliat taama nutaatigitillugit ima ajornartorsiuteqarsimanavianngilagut allaat aningaasaqarnerput pillugu tamat ilisimatissinnaanagit. Ukiormi ataaseq qaangiussimalerpoq, gruppimi siulittaasoq erseqqissaavoq.

Namminersorlutik Oqartussaaneq pillugu inatsit innersuussutigaa

Nuup qeqqani Tuujummi sanaartornerup unittooriasaarnera, taamatullu immikkut iluanaarutaasussamik aqutsisoqarfiup sanaartornerup aallarteqqinnissaanut isumaqatigiissusiornera pillugu, Peter Davidsen oqarpoq:

- Namminersorlutik Oqartussaaneq pillugu inatsit naapertorlugu, suliat aningaasaqarnermut tunngasut tamarmik aningaasaqarnermut ataatsimiititaliami suliarineqartassapput. Suliaq una taama pineqarsimanngilaq.

Aqutsisoqarfimmut isumaqatigiissut malillugu aningaasaliissutit iluanni sanaartornerit pineqarput. Taamaammat aqutsisoqarfik eqqortumik iliorsimasutut taaneqarsinnaagaluarpoq?

- Naamik. Ilisimatinneqarpugut suut tamarmik pissusissamisut ingerlasut. Paasinarsivorli taama ingerlasoqanngitsoq. Taama pisoqartoqarnerani ilisimatinneqarnissarput piumasaqaataavoq, Peter Davidsen oqarpoq, taassuma erseqqissarpaa aningaasat isumatusaartumik akisussaassuseqartumillu atorneqarnissaat politikerit akisussaaffigigaat.

- Lars Møller-Sørensen inuttut ajoriffissaqartinngilara. Politikerilli ilisimasat eqqortut aallaavigalugit aalajangertartussaapput. Suliani arlalinni taama pisoqarsimanngilaq. Atorfilittani akisussaanerpaaq tamassumunnga akisussaatinneqartariaqarpoq, gruppimi siulittaasoq erseqqissaavoq. Taassuma kommunalbestyrelsemi ilaasortat aggustip 27-ani ataatsimiinnissaat qilanaaraa.

Amerlanerussuteqartut aalajangissavaat

Suliaq kommunalbestyrelsemi ataatsimiinnermi suliarineqassaaq, amerlanerussuteqartullu aalajangissavaat Lars Møller-Sørensenip Siumumit isornartorsiorneqarnera kinguneqassanersoq.

- Lars Møller-Sørensen atorfimminut tulluunnersoq pillugu amerlanerussuteqartut aalajangissapput, Peter Davidsen oqarpoq.

Demokraatineersoq Justus Hansen ilisimatitsereerpoq Siumup isornartorsiuinera inissaminiinngitsoq. Demokraatillu isuma taanna aggustip naanissaanut attatiinnassagunikku taava Siumut kisimi isornartorsiuisuuvoq, politikkikkullu sakkuaanneq Lars Møller-Sørensenimut kinguneqassanngilaq.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS