Siumup sammivimmik allanngortiterinera Naalakkersuisooqatigiit attassinnaanngilaat
Naalakkersuisooqatigiit maannakkut atuuttut imaannaanngitsumik ajornartorsiuteqalerput Kuannersuarni suliniut pillugu Vivian Motzfeldt-ip tusagassiuutitigut nalunaarutaanik aallaaveqartumik. Naalakkersuisut siulittaasuata Kim Kielsen-ip partiini ilisarisinnaajunnaarpaa Demokraatillu ullut tulliuttut atussavaat naalakkersuisooqatigiit inissisimanerat nalilersussallugu
Kuannersuarni suliniut pillugu Siumup politikkiminik allannguinera Demokraatinut sakkortuumik sajuppillatsitsivoq. Tamanna partiip siulittaasuata Jens-Frederik Nielsen-ip uppernarsarpaa, taassuma ullut tulliuttut parteeqatini peqatigalugit nalilersussavaa naalakkersuisooqatigiit ingerlaannarnissaminnut tunngavissaqarnersut:
- Ilumoorpoq assut tupappunga Siumup siulersuisortaavisa politikkiminnik allannguinerat pillugu, aamma ilumoorpoq naalakkersuisooqatigiit ingerlaannarsinnaanissaat pillugu, pingaartumik Demokraatinit sukumiisumik nalilersuisariaqaleratta, Jens-Frederik Nielsen aviisimut Sermitsiamut oqarpoq.
Kielsen aalassassimaarpoq
Taamaattorli Jens-Frederik Nielsen kisimi aalassatsinneqanngilaq, tassami Naalakkersuisut siulittaasuat, Kim Kielsen aalassatsinneqarpoq Siumup siulersuisortaavisa partiip politikkianik allannguinerat pillugu:
- Unneqqarillunga oqassaanga assut tupigigakku partiima politikkikkut sangujoraartumik ingerlalernera isiginnittuuffigalugu, ataatsimeersuarnermut sanilliullugu siulersuisunngortut ulluni kingullerni allanngortiterisaqattaarnerat ilisarisinnaanngilara, allaanngilarluunniit partiitsinni siulersuisunngortut partiip ataatsimeersuarnerani aalajangersakkat soqutiginagit ingerlarsorniarsarisut.
- Assersuutigiinnarlugu maanna Kuannersuarni suliniut pillugu annikinngitsumik ersisaarineq ingerlanneqalerpoq, imatullu isikkoqalersitsisoqarpoq aalajangerneq aqaguagunnguaq pisussanngortoq. Taamatut sulisoqanngilaq aamma sulisoqalernavianngilaq, tusarniaanerit innuttaasunillu ataatsimiitsitsinerit inatsisit malillugit ingerlanneqarput, inatsisillu taakku Inatsisartut aalajangersagaraat. Massakkoqqissaaq aalajangertoqalinngilaq, tusarniaanerit innuttaasunillu ataatsimiitsitsinerit kingorna nalunaarusiortoqassaaq, aamma erseqqissaatigissavara Naalakkersuisut sulinerminni qiteralimmiorigamikku aatsitassanut inatsimmi paragraf 1 imm. 2 pinngitsoorani malinneqassasoq, taamaanngippammi Kuannersuarni suliniut Naalaakkersuisunit aalajangiiffigineqarnavianngilaq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: