qinersineq

Siumup qineqqusaartitaa: Angerlarsimaffeqanngitsut neqitarinagit

Siumup Inatsisartunut qineqqusaartitaata, Monica Dorphip, Inuit Ataqatigiit qineqqusaartitaat, Juliane Henningsen, angerlarsimaffeqanngitsunik ikilisaarusummat puffaammersimaarfigaa

- Angerlarsimaffeqanngitsut akiligassat akilertarnissaannut siunnersortariaqarpagut, Monica Dorph angerlarsimaffeqanngitsut qineqqusaarutigineqarnerannut iluarinninngitsoq oqarpoq

Inuit Ataqatigiit Inatsisartunut qineqqusaartitaata, Juliane Henningsenip, angerlarsimaffeqanngitsut ikilisinniarlugit illoqarfinni inissarsiorfiusuni inissianik sanaartortoqartariaqarnera oqariartuutigaa.

Kisianni Siumut sinnerlugu Inatsisartunut qinigassanngortittup, Monica Dorphip, Juliane Henningsenip nunatsinni inuit 500 missaaniittut angerlarsimaffeqanngitsut ikilisarnissaannut kissaateqarnera puffaammersimaarutigaa:

- Inissaaleqisut utaqqisutut allaqqasuutigineqartut 3.100 missaaniipput. Taakku qarsutiinnarlugit angerlarsimaffeqanngitsut inissialiuutissappat?, Siumup Inatsisartunut sassartitaa, Monica Dorph, taama aperaaq. Taanna isumaqarpoq angerlarsimaffeqanngitsut qineqqusaarutigineqarneri pissusissamisuunngitsoq.

- Aqqutissiuussinerunngilarmi pisortat akiligaannik angerlarsimaffeqanngitsunullu akeqanngitsumik ineqartinneqarnissaat qineqqusaarutigissallugu - illua tungaanilu akiliisinnaasut ilinniarsimasullu inissianik ajornerusunik neqeroorfigalugit!, Monica Dorph oqarpoq.

Atuaruk: Juliane Henningsen: Angerlarsimaffeqanngitsut ikilisarlugit

Akiliisarnissamut siunnersuisoqartarnissaa kissaatigaa
Monica Dorphp uani assersuutigivaa ilinniarluarsimasut inissianik pitsaasunik isorliunerusuni neqeroorfigineqarsinnaannginneriluunniit, soorlu Ittoqqortoormiuni. Monica Dorphip ilanngullugu aamma eqqaavaa nammineq ilisimagini inuit akiligassaminnut akiliinngikkaangamik anisitaasartut:

- Pitsaanerusumik angerlarsimaffeqanngitsunut anisitaasunullu iliuuseqartariaqarpugut sanngiifiinik tapersersorlugillu ikiortariaqarpagut. Ikorfartortariaqarpagut qaammarsaavigalugit siunnersorlugillu akiligassaqartoqaraangat inigisamut, meeqqerivinnut il. il qanoq iliortoqarsinnaanersoq, Monica Dorph oqarpoq.

Inuit Ataqatigiit qanoq iliuuseqarniarnersut paaserusukkaa
Juliane Henningsenip sapaatiummat ersarissarpaa Inuit Ataqatigiit angerlarsimaffeqanngitsunik februaarimi ataatsimeeqateqarsimasut, tamatumalu kingorna atugaannik aamma paasisimaqarnerulersimasut. Tamatuma kingorna Inuit Ataqatigiit ilaqutariinnermut inatsisinillu atuutsitsinermut naalakkersuisuusimasoq, Siumumeersoq Martha Lund Olsen, ataatsimeeqatigisimavaat.

- Juliane (Henningsen, aaqq.) aamma Kuupik (Kleist, aaqqiss.) angerlarsimaffeqanngitsut pulaarsimavasi, kingorna susoqarpamita? Arlaannik suliniutissanik iliuusissanilluunniit misissuivisi? Tamatumalu kingorna iliuusissaasinnaasunik aallarniivisi siunnersuuteqarlusilu? Assut soqutigineqarpoq paasissallugu sooq angerlarsimaffeeruttoqartartoq?, Monica Dorph, sooq angerlarsimaffeqanngitsut anisitaasarnersut pillugit paasisaqarusuttoq aammalu anisitaannginnissaq pillugu pitsaaliuverusuttoq, taama oqarpoq.


Asasara Juliane H,

- Neriuppunga angerlarsimaffeqanngitsunut inissaannik sanaartortoqarnissaa eqqarsaatigilluarsimallugu qineqqusaarutigigit. Kiammi angerlarsimaffeqanngitsut nutaanik inissaannik sanaartuunneqarnerat akilissavaa?,

Sinerissami inissiarpassuit nutaanerusut akisunerusullu suliffeqanngitsunut inigitinneqarput, illuatuangaanilu akissalinnut pitsaasunik inissaqartitsinata. Kommuneqarfinni arlalinni tamanna takussutissaqarpoq.

Tasiilami ilinniartitsisut vakantertinneqarrapput inissiallu nutaanerusut akisuullu suliffissaaleqisunut atorlugit. Qaqortumi aamma nutaaliani suliffissaaleqisut ineqartinneqarlutik.

Isorliunerusuni ilinniarluarsimasunik sinerissami amigaateqaqaagut, kisiannili pitsaasunik ineqarsinnaanissaannik neqeroortoqassanani. Illoqqortoormiiini illut arlallit iluarsarsinnarlugit neriorsuutigineqarnikuugaluarput ilinniartitsunut inigineqalersinnaasut, kisianni Kommuneqarfik Sermersooq illut taakku iluarsaanniarlugit aningaasaliissuteqanngilaq.

Inissaaleqisut utaqqisutut allaqqasuutigineqartut 3.100 missaaniipput. Taakku qarsutiinnarlugit angerlarsimaffeqanngitsut inissialiuutissappat?

Qinersisoqalersorlu angerlarsimaffeqanngitsut inissaannik sanaartortoqarnissaa qineqqusaarutigissallugu kukkusumik oqariartuuteqarneruvoq.

- Juliane Kuupillu angerlarsimaffeqanngitsut pulaarsimavasi, kingorna susoqarpamita? Arlaannik suliniutissanik iliuusissanilluunniit misissuivisi? Tamatumalu kingorna iliuusissaasinnaasunik aallarniivisi siunnersuuteqarlusilu? Assut soqutigineqarpoq paasissallugu sooq angerlarsimaffeeruttoqartartoq?

Angerlasimaffinnimmi anisitsisoqartarpoq akiligassat akilerneqarsimanngikkaangata, asuliinnarmi nuannariinnarlugu anisitaasoqartanngimmat. Uanga suleqataarusuppunga misissuisoqarnissa paasiniarlugu suut patsisaanersut anisitsisarnermut, qanorlu inissianit anisitsisarneq pinngitsoortinneqarsinnaasoq.

Powered by Labrador CMS