qinersineq
Siumup qineqqusaartiaa: Sooruna KNRip kalaallisut oqaatsit tunulliukkai?
Inatsisartunut qinigassanngortittoq isumaqarpoq KNRip qineqqusaarnerit kalaallisuut kisiisaa qallunaatuunngortittaramigit kalaallisuinnaq oqaasillinnut immikkoortitsisoq
KNRip qallunaat oqaasii salliutippai qineqqusaartunik aallakaatitsinermini.
Taama isumaqarpoq Siumut sinnerlugu Inatsisartunut qinigassanngortittoq Margrethe Thårup Andersen.
KNR innuttaasunik kiffartuussisuulluni kalaallisut qallunaatullu Inatsisartunut qineqqusaarnerit tv-kkut aallakaatittarpai. Taakkualu aallakaatinneqartarneranni Siumut sinnerlugu Inatsisartunut qinigassanngortittup, Margrethe Thårup Andersenip, tupigusuutigaa KNRi aalajangersimammat taamaallaat qineqqusaarnerit kalaallisoortaat KNR2-kkut qallunaatuumut toqqaannartumik nutsertarniarlugu.
- Inatsisartunut qineqqusaarneq KNR-ikkut kalaallisoortoq aallakaatinneqaraangat, toqqaannartumik KNR 2-kkut qallunaatut nutserneqartarpoq, qallunaatullu qineqqusaarneq ingerlanneqartillugu kalaallisut nutserisoqarneq ajorluni, Margrethe Thårup Andersen oqarpoq, nangillunilu:
- Kalaallisuumiit qallunaatuumut nutserneqartarnera isornartussaqartinngilara, kalaallisulli oqaluttut assinganik atugassaqartinneqartariaqarput.
Isumaqarpoq kalaallisut oqaatsit salliutinneqartariaqartut
Margrethe Thårup Andersen oqaluttuarpoq nammineq toqqaannartumik KNRimut saaffiginissimalluni paaserusullugu sooq qallunaatut qineqqusaarnerit kalaallisuunngortinneqartannginnersut paasiniarlugit. Saaffiginninnermini ilisimatinneqarsimavoq aallakaatitassiani nutserisitsisarneq ajornartorsiutigineqartoq, ataatsimiissutiginiarneqartorlu.
- KNR aallakaatitassiani ”Inatsisartunut qinersineq 2014” aallakaatinneqarnerini nutserisussaalatsinerarpoq, Margrethe Thårup Andersen oqarpoq, nangillulu:
- Nutserisussaalatsisoqarpammi taava kalaallisut oqaluttunut qallunaatut paasisinnaanngitsunut nutserinissaminut salliutitsiniarli.
Margrethe Thårup Andersenip ilanngullugu tupigusuutiginerarpaa sooq KNR innuttaasunut ilisimatitsisimannginnersoq ajornartorsiutiminnik, naak nunatsinni oqaatsit pillugit inatsiseqalereernikuungaluartugut.
- Aalajangiinissarmi pingaaruteqarluinnaqqissaartillugu kalaallit innuttaasut aamma pisussaaffigisariaqarpaat qallunaatut qineqqusaarnerit aamma kalaallisuunngortinneqarnissaat, Margrethe Thårup Andersen isummersorpoq.
Sermitsiaq.AG KNRimiit isummersortitsiniarpoq.