Siumup Qarsoq Høegh-Dam atorfinitsippaa

Siumut politikkikkut siunnersortiminut Ineqi Kielsenimut inuulluaqqusivoq, taanna ilinniarnerminik aallussiniarluni aalajangerpoq, maannalu partiip allattoqarfiani Qarsoq Høegh-Dam atorfinitsinneqarpoq, partiimi allatsi Ole Aggo Markussen Sermitsiaq.AG-mut uppernarsaavoq.

Qarsoq Høegh-Dam Siumumi partiip allattoqarfiani atorfinittussanngorpoq.

Allattoqarfimmi immikkut siunnersortitut atorfinittussanngorluni, Sermitsiaq.AG-mut ilisimatitsivoq.

- Ukiuni qulini kingullerni politikki inuiaqatigiilerinerluni Siumumi, KNAPK-mi aamma allani suliaqarfigaara, taamaammat suliariuarsimasama nanginnissaa qilanaaraara, taanna oqarpoq, nangillunilu:

- Kalaallinut inuiaqatigiinnut tunngasut tamaasa piumassuseqarfigaakka, partiillu allattoqarfiani nutaanik pisoqartuaannarnera nuannaraara. Avatangiisit sungiusimasat nutaanik inuttallit pineqartut oqaatigineqarsinnaavoq, kingullermik allaffimmiinninnit Inatsisartut Allattoqarfianni nutaarpassuarnik inoqalernikuuvoq.

Siornatigut partiimut sullissinikuuvoq

Qarsoq Høegh-Dam folketingimut qinersisoqarnerani kingullermik aamma partiip allaffiani ikiuuppoq, taassuma najaa Aki-Matilda Høegh-Dam, Nunatsinni qinigassanngortittut 14-it akornanni qinigaanerpaalluni ilaasortanngoqqippoq.

Qarsoq Høegh-Dam Inatsisartunut 2021-mi qinersisoqarnerani qinigassanngortippoq, Siumumilu qinigassanngortittut akornanni qinigaanerpaat sisamaattut inissippoq. Kisianni ullormi Inatsisartunut ilaasortanngorfissamini tunuarniarluni aalajangerpoq.

Hashimik tigummisaqarluni pineqaatissinneqartoq

2019-imi hashi pillugu suliami pineqaatissinneqarsimanera, qinersisoqarnerata kinguninngua saqqummiunneqarnerata kingorna tamanna pivoq.

Sivisuumik eqqartuussivimmi suliarinninnerup kingorna – siullermik Eqqartuussisoqarfimmi kingornalu Nunatta Eqqartuussisuuneqarfiani – suliareqqinneqarnerani, nuna tamakkerlugu politikkikkut saqqummeeqqaartoq, ulloq 7. oktober 2019 1.500 koruuninik akiliisussanngortinneqarpoq, hashimillu 49 gramimik arsaarneqarpoq.

Powered by Labrador CMS