Siumup piumasaraa namminersornermut inatsit allanngortinneqassasoq

– Nunami imaanilu pisuussutit inuiaat kalaallit pigaat, partiip siulittaasua Erik Jensen oqarpoq.

Siumup siulittaasuata Erik Jensenip piumasaraa namminersornermut inatsit allanngortinneqassasoq, taamaalilluni aatsitassanit isertitat tamaasa siunissami Kalaallit Nunaata pisalissallugit: - Nunami imaanilu pisuussutit inuiaat kalaallit pigaat.

Namminersornerulluni oqartussaaneq. Namminersorluni oqartussaaneq. Namminiilivinneq.

Ukiorpassuarni taamaattussatut isigineqarsimavoq, Siumulli siulittaasuata Erik Jensenip Kalaallit Nunaata siunissaa taama eqartigisariaqanngitsoq isumaqarpoq.

– Suliassat siumut aalajangeriikkamik tulleriiaarlugit tigusarnissaannik eqqarsariaasitoqaq qimassavarput, taarsiullugulu suliassat angisuut piuminaatsullu ataatsikkut aaqqinniarnissaannut qunussanngilagut, taamaalilluta anguniagaq sukkanerusumik angusinnaassagatsigu, immitsinnut utaqqinata allalluunniit utaqqinagit, Erik Jensen Sermitsiamut oqarpoq.

Isorinnittunit namminiilivinnissamik oqallinneq upperinanngilaq, tassami namminersorluni oqartussaaneq suli angusimanngilarput, 2009-mi sapaammi juunip 21-ani Nuummi Nuutoqqami tamanna nalliussineqaraluartoq.

Namminersornermut inatsit naapertorlugu akisussaaffinnit tiguneqarsinnaasunit 33-nit, taamaallaat aatsitassanut imaanilu sullivimmi avatangiisinut akisussaaffiit tiguneqarsimapput, tamannalu pivoq 2010-mi.

Allaaserisaq tamaat uani Sermitsiami pisiarsinnaasanni atuaruk:

Powered by Labrador CMS