Siumup Hans Peter Poulsen sinniisussatut Inatsisartunut isertippaat

Kommuni Qeqertalimmi kommunaldirektøriusimasoq Hans Peter Poulsen Nikkulaat Jerimiasseni paarlallugu Inatsisartuni issialissaaq.

Kommuni Qeqertalimmi kommunaldiretøriusimasoq maannalu Siumup Inatsisartuni allaffiani siunnersortaasoq Hans Peter Poulsen Inatsisartuni Nikkulaat Jerimiasseni taarserlugu issialissaaq.

Partiimi Siumumi siulittaasup Erik Jensenip tamanna Sermitsiaq.AG-mut uppernarsarpaa. Partiip Poulsen Nikkulaat Jerimiassenimut taarsiullugu Kim Kielsenip sinniisussaatut aggersarneqarnissaa ataasinngormat qinnutigisimavaa, tassani Nikkulaat Jerimiassen aalisartut piniartullu kattuffiani KNAPK-mi siulittaasutut politikkikkut suliaqartussaannginnera pissutigalugu.

Inatsisartut Hans Peter Poulsenip sinniisussatut akuersissutigisussaavaat, naggataatillugu Qinigaanerup misilinneqarnissaanut ataatsimiititaliaq Inatsisartullu Hans Peter Poulsenip Inatsisartuniilernissaa akuerisussaallugu.

KNAPK-mi siulittaasunngortoq

Kim Kielsen Inatsisartuni novembarip 30-ata tungaanut sulinngiffeqarnerani Nikkulaat Jerimiassen sinniisussatut inissisimavoq.

Nikkulaat Jerimiassenili aalisartut piniartullu kattuffiani KNAPK-mi siulitaasussatut ippassaq toqqarneqarpoq, kattuffiullu ileqqoreqqusai naapertorlugit politikkikkut suliaqarsinnaanani. Taamaalilluni Inatsisartunit Kommuni Qeqertalimmilu kommunalbestyrelsimit aninissamut qinnuteqartussaalluni.

Nikkulaat Jeremiassen sanaartornermut ataatsimiititaliami siulittaasup tullerivaa aamma Inatsisartuni Suleriaatsiumut Ataatsimiititaliami ilaasortaavoq.

Siunnersorti Inatsisartuniilersoq

Hans Peter Poulsen inuiaqatigiilerinermi Ilisimatusarfimmi kandidatinngorsimavoq. Siusinnerusukkut Kommuni Qeqertalimmi kommunaldirektøriusimavoq 2019-imilu allanik misileerusulluni atorfimminit tunuarsimalluni.

Poulsen ilaatigut KNR-p siulersuisuini ilaasortaasimavoq.

Maanna partiimi Siumumi siunnersortitut atorfeqarpoq, sinniisussatulli novembarip naanissaata tungaanut Inatsisartuni issiassalluni.

Powered by Labrador CMS