Siumup Partii Naleraq aamma Inuit Ataqatigiit ataatsimeeqatigai

Inuit Ataqatigiit aamma Partii Naleqqap siulittaasui Sermitsiaq.AG-p pissarsiarinissai iluatsippai, taakku marluullutik Siumut kaffisoqatigisimavaat. Sara Olsvigip pingasunngornermi ualikkut siulersuisuunini ataatsimeeqatigissavai.

Sermitsiaq.AG-p pingasunngornermi siusissukkut oqaluttuareriigaatut, Siumumi siulittaasup Kim Kielsenip, qinersinerup inernerata inernerata saqqummiunneqarnerata kingorna, partiit sorliit Naalakkersuisunut peqataasissanerlugit aalajangiusimanngilaa.

- Inatsisartuni partiit tamarmik oqaloqatigiinnissamut qaaqquneqassapput, oqaloqatigiinnerit kingorna anoraa sumut samminersoq takujumaarparput, Kim Kielsen, pingasunngornermi ullaakkut qasulluni taama oqarpoq.

Sara annikitsuinnarnik paasissutissaatilik

Inuit Ataqatigiit siulittaasuat unnuaq Siumumut ajorsarnerup kingorna suli sinissimanngilaq.

Sivikitsumik apersorneqarnissamut piffissaqarnersoq apeqqummut ima akivoq:

- Naagga, siulersuisuunerit ataatsimeeqatigiliivippakka.

Siumukkunni kaffisornikuunngilisi taava?

- Ilumut, Siumukkunni kaffisorpugut.

Taamaappammi isumaqatiginninniartoqarpa?

- Aap, kisianni tamanna oqaaseqarfiginianngilara, tusagassiuutitigut isumaqatiginninniarniannginnatta, Sara Olsvig oqarpoq.

Partii Naleraq minutsit 15-it kaffisoqatigineqartut

Partii Naleqqap siulittaasua pingasunngornermi ualikkut Sermitsiaq.AG-p pissarsiaraa.

Partii minutsini 15-ini Siumukkunni kaffisorsimasoq, partiip siulittaasua Hans Enokenip Sermitsiaq.AG-mut ilisimatitsissutigaa.

- Isumaqatiginninnianngilagut. Qinersinerup inernera aamma naalakkersuisoqatigiit kingulliit oqaluuserineruagut, Hans Enoksen oqarpoq.

Qaaqquneqaqqissavisi?

- Taakku (Siumut, aaqq.) partiit tamaasa kaffisoqatiginiarpaat, taakkulu ataatsimeeqatigeqqikkusukkunitigut attaveqarfigeqqinniarpaatigut, Hans Enoksen oqarpoq.

Partiimi siulittaasut sinneri, Sermitsiaq.AG-p pingasunngornermi ualikkut pissarsiarisinnaasimanngilai.

Powered by Labrador CMS