Siumup oqartussaaffiit angerlaakkusuppai

Oqartussaaffiit angerlaassornissaanut sulineq sukkanerusariaqarpoq. Siumut, nunap naalagaaffinngornissaanik siunertaqarluni Inatsisartunut qineqqusaarnerminik saqqummiussinermini taama oqariartuuteqarpoq.

- Nassuerutigisariaqarparput oqartussaaffiit nunatsinnut angerlaassornissaanut suliat oqaloqatigiinnerillu qinigaaffinni kingullerni kigaappallaarsimasut. Ima oqaatigissavaram suliniuteqarpugut suliat sukkatsisinniaratsigit, Siumumi siulittaasoq Erik Jensen, partiip qineqqusaarutiminik "Nunarput innuttaminit napatinneqartoq" saqqummiutereernerata kingorna Sermitsiaq.AG-mut taama oqarpoq.

- Takutikkusupparput uagut timitaliisinnaassuseqaratta, oqarpoq.

Akisussaaffiit Danmarkimit ingerlanneqartut nunatsinni ingerlanneqalernissaannut tunngatillugu suliaqartussamik Siumut ataatsimiititaliarsualiorusuppoq.

Oqartussaaffik nunatta kingullermik tigusaa tassaavoq aatsitassanut oqartussaaffik.

- Oqartussaaffinnik angerlaassuilernissamut tunngatillugu ulluliinissaq imaluunniit ukiumik taasaqarnissaq mianersuutissavara. Danskilli oqartussaasuinik oqaloqateqarneq qinigaaffimmi matumani annertusarneqassaaq, oqarpoq.

Piareersarneq aallarteriissaaq

Oqartussaaffiit ilaat Danmarkimit angerlaanniarneqartussatut oqaloqatigiissutigineqartussaaq tassaavoq inuussutissanut oqartussaaffik. Aalisarnermut, piniarnermut nunalerinermullu naalakkersuisuusimasup, Nikkulaat Jerimiassenip paragraf 37 atorlugu apeqqummut akissutigisimasamini ilisimatitsissutigaa Savalimmiut oqartussaaffik Danmarkimit tigummassuk ukiumut 20-35 milliuunit koruuninik aningaasartuutaalersimasoq.

- Qularinngilara aningaasartassai nassaarissagigut. Maanna piareersarneq aallartittariaqarpoq, oqartussaaffimmi tigusinissatsinnut atortussat ilinniartitaanikkullu piareersarnerit ingerlassallugit, Siumut siulittaasuat oqarpoq.

Amerlanerusut ilinniagaqassapput

Oqartussaaffiit angerlaassorneranni sulisut ilinniarsimasut amerlanerusut pisariaqartinneqariartulissapput.

Siumup suliniutiginiarpaa 2030-mi innuttaasut 50 procentii ilinniagaqartuunissaat, inuussutissarsiornerup iluaniuppat ilisimatusarneruppalluunniit.

Erik Jensen erseqqissaavoq ilinniarnertuunngorniarfimmi, inuussutissarsiornermik ilinniarfinni allanilu nalilersuinerit ingerlanneqartariaqartut, ilinniartut uniinnartarnerannut pissutaasut aporfiillu paasineqarniassammata.

- Allatut iliornissamut akissaqanngilagut. Ilinniakkaminnik unitsitsiinnartartunut iliuuseqartariaqarpugut, soorlu aamma meeqqerivinni meeqqallu atuarfiini pitsaassutsip qaffassarnissaanut aningaasaliinerusariaqartugut, inuusuttut ilinnialernissamut piareersimanerulernissaannut aqqutissiuussilluta, Erik Jensen oqarpoq.

Meeqqat atuarfianni naammassisut quliugaangata sisamat ilinniakkamik ullumikkut aallartitsinngitsoortarput.

Ilinniartitaanerup annertusinissaanut kollegialiortitsinerit, ilinniartitaanerup iluani periusissiornerit suliffinnilu misiliilluni ilinniarnerit Siumumit sulissutigineqaqqinniarput.