Siumup Nunamineralsimit isornartorsiorneqarnini 'ajuusaarutigaa'

Nunamineralsip pisortaanera Ole Christiansen aamma partii Siumut isumaqatigiinngillat.

Nunatsinni politikkikkut sangujoraarluni ingerlasoqarnera pissutaalluni Nunamineralsip ukiuni kingullerni ineriartornera ajoqquserneqartoq, Nunamineralsimi pisortaajunnaarniarlini ataasinngornermi nalunaaruteqartoq, Ole Christiansen, januaarip 29-ani oqarpoq.

- Inatsisartunut 2013-mi qinersisoqarnera Kalaallit Nunaanni aatsitassarsioqatigiiffinnut eqquivoq annertuumik, ingerlatsiveqatigiiffiup immikkut ittumik ataatsimeersuarnerani Ole Christiansen ilaatigut oqarpoq. Nunamineralsimit sooq tunuarniuteqarnerluni annertunerusumik oqaaseqarfigerusunngilaa.

Sermitsiaq.AG-p Naalakkersuisunut siulittaasoq Kim Kielsen Siumumeersoq oqaatigineqartut pillugit oqaaseqartinniaraluarpaa, sulili saaffiginnissutaasoq akineqanngilaq.

Isornartorsiuisoqarnera tunngaveqanngitsoq
Siumup politikkikkut oqaaseqartartua Suka K. Frederiksen tusagassiutinut nalunaaruteqarpoq, tassani royaltyp Inatsisartuni 2013-mi atuutilersinneqarsimanera illersorpaa.

- Siumumiit uggoraarput naalakkersuinikkut Siumup ingerlatsinera tikkuartorlugu akisussaa-tillugu uparuartorneqarmat, Siumumiit pingaartipparput nunatsinni atugassat assigiimmik tamarmik suliffeqarfinniit pissarsissutaassasut, niuerneq taamaappoq, pisuussutit nunatta ingerlanneqarneranut iluaqutaanerpaaffissaat angusariaqaratsigu.

- Nunatta pisuussutaanik atuinerit akileraarusersorneri Siumumiit isumaqarpugut aningaasanik iluanaarutissat eqqarsaatigalugit aaqqiissutaasoq naammaginartoq, soorluttaaq anguniagarigipput nunatta aningaasaliiffigissallugu maannakkorniit suli pilerinarnerulersinnissaa, inussutissarsiornermi akileraarutip appartillugu naleqqussarneratigut, Suka K. Frederiksen nassuiaavoq.

Siumumit oqaatigineqarpoq ilaannakortumik Namminersorlutik Oqartussanit pigineqartoq Nunaminerals A/S 'ukiuni arlaqartuni aningaasaqarnikkut ajornartorsiortuusoq'.

- Pingaaruteqarsoraarpullu soorlu naalakkersuinikkut tamanna kissaatigineqarsimasoq nutaamik ingerlariaqqinnissamut aningaasarsiornikkut immikkut pilersaarusiortoqarluni saqqummiussisoqartariaqartoq, Suka K. Frederiksen oqarpoq.

Tunuarniuteqartoqarnera tusaatissatut tiguaat
- Ole Christiansenip Nunamineralsimi pisortaanertut Siumumit qanoq oqaaseqarfigisinnaavisiuk?

- Inuttut nammineerluni tunuarniuteqarpoq. Soorunami tunuarniuteqarnera tusaatissatut tiguarput, Suka K. Frederiksen oqarpoq.

Ole Christiansenip Sermitsiaq.AG-mit apeqqutigineqartut amerlanerusut akerusunngilai ataasinngormat, aamma Siumut pillugu isornartorsiueqqikkusunngilaq. Taamaattumik allattoqarfimmit paaserusunneqaraluartut, soorlu Nunamineralsimit siulersuinikkut aqutsinikkullu aningaasaqarnikkut ajornartorsiorneranut kikkut akisussaanersut pillugu apeqqut ilaatigut akineqanngilaq.

Nunaminerals A/S-ip aktiaataat aktiamut ataatsimut 5 koruunimit 10 oorinut appartinneqarpoq. Suliffeqarfiup nammineq aningaasaatai 137.954.700-ninit 2.759.094 koruuninut appartinneqarput, taakkulu annaasanut matussusissapput. Nunamineralsip siulersuisuisa ataatsimiinnerat Hotel Hans Egedemi Nuummiittumi immikkut ittumik ataatsimeersuarnerannit taamatut aalajangertoqarpoq.