Siumup nuna tamakkerlugu ataatsimeersuarnissani attatiinnarpaa
Coronap nunarsuarmi tuniluunnera pissutigalugu angalanissamut killilersuisoqaraluartoq, Siumup ataatsimeersuarnissani septemberip ulluisa sisamaaniit arfernanut Ilulissani ingerlanniarpaa, aallartitat taaseqataasinnaasut 64-it peqataasoralugit.
Siumup tusagassiorfinnut nalunaaruteqarnermi ilisimatitsissutigaa, "Namminersornerusut Covid-19 pillugu nalunaarutaat naapertorlugu, naalakkersuinikkut siunertaqarlutik
katersuuttut tamat oqartussaaqataaneq pingaartillugu nassuiaaserpaa", tamannalu tunngavigalugu partii ataatsimeersuarniartoq.
Nalunaarusiaq ilaatigut naalakkersuinikkut ingerlataqarlutik partiiusunut periarfissiivoq ataatsimiinnissat katersuunnissallu kommunit killeqarfii akimorlugit ingerlanneqarsinnaasunngorlugit, tamanna sulisartut kattuffiata SIK-p paasisinnaanngilaa, tassami ataatsimiinnissamut itigartinneqarsimagamik. Tamatuma malitsigisaanik SIK-p siulittaasua Jess G. Berthelsen Namminersorlutik Oqartussanut taarsiivigineqarnissaq piumasarivaa.
Siumup aaqqissugaanikkut siulittaasuata tullia, Evelyn M. Frederiksen ima oqarpoq:
- Covid-19 pissutigerpiarlugu Siumup siulersuisuunerisa aalajangersimagaluarpaat digitalimik ataatsimeersuartoqassasoq oqallinnerillu annertunerusut 2021-imut kinguartiinnarlugit. Immikkoortortaqarfinni amerlanerussuteqarluartut piumasarivaat ataatsimeersuartoqassasoq inuttut najuulluta. Aalajangersaaneq tamanna siulersuisuunerit tusaatissatut tigusariaqarsimavaat.
Allakkatigut atsiortitsineq
Nuallussuup ingerlaavartumik ineriartornera partiimit malinnaavigineqassaaq, sapinngisamillu Covid-19 pillugu iliuuserisassatut maleqquneqartut malilluinnarlugit ingerlatsitsoqarniartoq, tusagassiorfinnut nalunaarummi allassimavoq
- Ataatsimeersuarnermut aallartitat piumaffigisimavagut allakkatigut atsioqqullugit, Nunatta Nakorsaanerata maleruaqqusai peqqissarnikkut innersuussutit maleqqullugit, aammalu Covid-19-imut tunngatillugu aarlerinarsinnaasut ilisimaqqullugit. Partii ataatsimeersuarnissani sapinngisaminik annertunnerpaamillu peqqinnissaqarnikkut ilisimasatigut innersuussutaasut malilluinnarlugit ataatsimeersuartitsiniarpoq, Evelyn Frederiksen nangilluni allappoq.
Ataatsimeersuarnissaq siulittaasunngorniuttoqartussaammat pissanngatigineqarpoq. Vivian Motsfeldt Erik Jensenilu Kim Kielsenimut sassaqqinniarluni nalunaarnikumut unammillertussaapput.