Siumup najukkani immikkoortortaqarfiisa ataatsimeersuarnissaq kinguarteqqugaat
Siumumi siulersuisuunerit maajip qaammataata naanerani nalunaarutigaat, aasaru nuna tamakkerlugu ataatsimeersuarnissaq taamaatiinnarneqartoq, paarlaallugulu digitalikkut partii ataatsimeersuassasoq. Taamatulli aalajangersimaneq partiip najukkani immikkoortortaqarfiinit arlalinnit akerlerineqarpoq.
Siumumit aallartitat 65-it pilersaarutit malillugit juulip arfineq-pingajuaniit qulinganut Ilulissani ataatsimeersuartussaagaluarput. Tassani siulittaasussamik nutaamik siulersuisussanillu qinersisoqartussaavoq, aamma partiip politikkikkut ukiuni aggersuni anguniagassai oqaluuserineqartussaagaluarlutik.
Ataatsimiinnissarli maanna Nuummut nuunneqarsimavoq, juulip qulingani inunnik ikiuttuinarnik najuuffigineqartussamik. Siulittaasussamik nutaamik siulersuisunillu nutaanik qinersinissaq oqaluuserineqassalluni, partiilli ukiuni aggersuni anguniagassai pillugit oqallinnissaq 2021-p aasaanut kinguartinneqarsimalluni. Tamannali najukkani siulittaasunit arlalinnit akerlerineqarpoq.
Akerliusut ilagaat Siumup Ilulissani immikkoortorqarfiani siulittaasoq, Jørgen Kristensen.
- Siulersuisuunerit piumaffigisimavavut, nuna tamakkerlugu ataatsimeersuarnissaq ukiamut kinguarteqqullugu, isumaqaratta politikkikkut ingerlatassat siulittaasumillu qinersinissaq ataatsimiinnermi ataatsimi pisariaqartoq. Aamma digitalikkut nuna tamakkerlugu ataatsimeersuarneq tamakkiisuunngitsutut isumaqarfigingatsigu, taanna Sermitsiaq.AG-mut oqarpoq.
Siulittaasunngorlaap digitalikkut ataatsimiinnissaq isumaqatiginngikkaa
Nuummiit aamma siulersuisuunerit qinnuigineqarsimapput, taamatut aalajangerneq nalilersoqqiqqullugu.
- Siumut Nuuk siulersuisuunernut kaammaatuuteqarsimavoq, ilaasortat najuunniassammata, nuna tamakkerlugu ataatsimeersuarnissaq kinguarteqqullugu. Tamatuma qanoq ingerlanneqarnissaa pillugu najukkani immikkoortortaqarfiit isumasiorneqarnissaat kissaatigaarput, Siumut Nuummi siulittaasutut qinigaarlaaq Inga Dora G. Markussen oqarpoq.
Sisimiuniit aamma taamatut isummerneq tapersersorneqarpoq.
- Siulersuisuunerit saaffigisimavavut, ataatsimiinnissamik ukiamut kinguartitseqqullugit, digitalikkut ataatsimiittoqarnissaanut isumaqataannginnatta, najukkami immikkoortortaqarfimmi siulittaasoq Erik Jensen oqarpoq.
Politikki siulittaasumillu qinersineq imminnut attuumassuteqartut
-Aallartitat tamaasa ilagalugit politikki oqaluuseralugu ataatsimiikkusuppugut. Oqarasuaatikkut ataatsimiinnikkut tamanna pisinnaanngitsoq isumaqarpugut, taanna oqarpoq.
Ilulissani aamma politikki siulittaasussamillu qinersinissaq immikkoortillugit oqallinnissaq eqqarsarnartoqartinneqarpoq.
- Maanna siulittaasussamik nutaamik qinersisoqarpat, aatsaallu kingusinnerusukkut partii qanoq politikkeqassanersoq oqaluuseralugu, naapertuuttoqarunnaarsinnaavoq, Jørgen Kristensen oqarpoq.
Immikkooortortaqarfinni siulittaasut siulersuisuunerit ataatsimeeqatigineqarnissaanik qaaqqusissummik tigusaqarput pingasunngornermi, tassani ataatsimeersuarnissaq eqqartorneqassalluni.