Siumup misissuineq utaqqivaa

Siumup Inatsisartuni ilaasortaatitaasa maanna tikkuarpaat Aleqa Hammondip namminersorlutik oqartussanut akiligassi pillugit misissuinerup inernera utaqqigitsik. Taamatut tusagassiorfinnut nalunaarutikkut allapput Siumup gruppiata siulittaasua Jens Immanuelsen aamma partiip politikkikkut oqaaseqartartua Karl-Kristian Kruse.

– Siumup Inatsisartuni ilaasortaatitaasa erloqinartutut isigaat ilaasortat ataasiakkaat tusagassiorfitsigut issuarneqarsimammata oqaatigisimanngisaminnik. Assersuutissaavoq Doris Jakobsen, sapaatiummat Sermitsiaq.AG-mi oqaaserisimanngisaminik issuarneqartoq. Tamatumuuna uppernarsarneqarpoq tusagassiorfiit ilaasa Siumup iluani avissaartuunnissaq maanaannarlu qinersinissaq tamaviaarukkaat, illua'tungiliuttut assigalugit, tusagassiorfinnut nalunaarummi allassimavoq.

Sermitsiaq.AG-p Doris Jakobsen issuarlugu ilanngussaqarsimanngilaq.

Pineqarpoq Sara Olsvigiimit issuaaneq atuartartullu uani takusinnaavaa qanoq oqartoqarnersoq

Oqaaseqaallu Doris Jakobsenimit tusagassiorfinnut nalunaarutikkut allakkut uppernarsarneqarpoq, tassani oqarami misissuinerup inernissaa utaqqillugu. Misissuineq, Kukkunersiuinemut Ataatsimiititaliap tusagassiorfinnut nalunaarutaa naapertorlugu, naammassereersimasoq.

Taamaasilluni Doris Jakobsen, Siumut tusagassiorfinnut nalunaarutikkut allappoq ´Sermitsiap nittartagaani atuarneqarsinaavoq oqartinneqarsimasunga, Aleqa H. inatsisinik unioqqutitsisoq suliarlu naammassereersoq.

Tamanna eqqunngilluinnaqqissaarpoq. Ataatsimilluunniit Sermitsiamit attavigineqarnikuunngilanga, aamma oqarnikuunngilanga suliaq naammassisoq Aleqalu inatsisinik unioqqutitsisoq´.

Sermitsiaq.AG-mili taamatut allassimanngilaq.

Nangilluni Doris Jakobsen allappoq: ´Facebookimi politikeriut qupperninni aajuna allatara paatsoorneqarsinnaanngitsoq:

Inuttut ataasiakkaarluta eqqartuussisunngunnginnitsinni misissuinissap inernissaa takoqqaalaarallartigu.

Kukkunersiuinermut ataatsimiititaliap misissuisitsinera naammassippat paasinarsissaaq inatsisinik unioqqutitsisoqarsimanersoq aamma naalakkersuisut siulii kikkut nunatta karsianut akiitsoqarsimanersut´, Doris Jakobsen allappoq, taamatorpiarlu oqarneranik Sara Olsvigip Sermitsiaq.AG-mi allaaserisami issuarpaa.

Doris Jakobsen nangilluni allappoq:

´Imaanngilaq Siumuungama illersuiniaannassasunga, uppernarsineqarpat atornerluisoqarsimasoq illersuinavianngilanga apeqqutaanngilaq Siumuuneq, IA-juneq, Atassutaaneq allatulluunniit parteeqarneq... Inatsisit inatsisaapput, kisianni misissuisitsineq utaqqineqaqqaartariaqarpoq tamannalu naammassippat naliliiumaarpugut.´

´Taamatut naqqiissuteqarlunga piaartumik piumasaraara eqqunngitsumik paasissutissiineq iluarseqqullugu´, Doris Jakobsen tusagassiorfinnut nalunaarutikkut allappoq, taannalu Sara Olsvigip oqaaseqaataani issuarneqarsimavoq, aammalu Doris Jakobsenip tusagassiorfinnut nalunaarutikkut nammineq uppernarsarpaa qanoq issuarneqarsimaninik.