Siumup marloqiusamik qinigaaffeqartarneq atuutilerseqqippaa
Siumup nuna tamakkerlugu ataatsimeersuarnerani taasisinnaasuni amerlanerussuteqartut partiimi ilaasortat marloqiusamik qinigaaffeqarsinnaanerat atuutilerseqqippaat.
Siumumi ilaasortat maanna partiip malittarisassaannik unioqqutitsinatik kommunalbestyrelsimi Inatsisartunilu ilaasortaasinnaanngorput. Nuna tamakkerlugu ataatsimeersuartut arfininngornermi unnukkut tamanna aalajangerpaat.
Nuna tamakkerlugu ataatsimeersuarnermi siunnersuutit assigiinngitsut aallartitat eqimattakkaarlutik oqaluuserereernerisa kingorna tamanna pivoq. Tassani aamma partiimi ilaasortat marloqiusamik qinigaaffeqarnerminnit taamaatitsiumanngitsut tunuartinneqarnissaannik siulersuisuunerit siunnersuutaat oqaluuserineqarluni.
Siumut Avannaa, Siumut Qeqqa, Siumut Sermersooq nalunaaruteqarput, politikerit marloqiusamik qinigaaffeqartassanersut politikerit ataasiakkaat imaluunniit qinersisartut aalajangigassarigaat.
- Marlunnik ilaasortaaffeqarneq iluaqutitaqartoq nalilerparput. Iluaqutissarpassuit ilagaat, politikerit marlunnik ilaasortaaffeqaraangamik ilisimasarpassuarnik pissarsisarneq, Siumumeersoq Erik Jensen tunngavilersuivoq.
Siumut Kujallermili amerlanerussuteqartut marloqiusamik qinigaaffeqartarneq akuerinngilaat, kisianni tamanna pillugu Siumut Kujallermi annertuumik isumaqatigiinngitsoqarmat tamatuma taasissutigineqarnissaanik kissaateqarput.
Tamatuma kingorna nuna tamakkerlugu ataatsimeersuarnermik aqutsisup, Paaviaaraq Heilmannip, aallartitat taasitippai.
Aallartitat 45-t marloqiusamik qinigaaffeqartarneq akueraat, qulit akuersinngitsut, sisamallu taasinngitsut.
Taasisinnaatitaasut Nuummut tikinngitsoortut, kisianni oqarasuaatikkut peqataasut tusaaniarneqanngillat, taasinerit agguataarneqarnerat aalajangiisuummat.