Siumup juullimut kissaataa: Múte atorfimmit tunuartariaqarpoq

Suliassaqarfimmi pingaarutilimmi Naalakkersuisuni piaartumik taarsiisoqartariaqarpoq, Siumut taama isumaqarpoq, Inatsisartut nunanut allanut politikki pillugu annertuumik sakkortuumillu oqallittoqarmat taama piumasaqarpoq.

Siumut paatsuugassaanngitsunik marlunnik Naalakkersuisunut kaammattuuteqarlutik Ukiaanerani Ataatsimiinneq naammassivaat.

Aappaa tassaavoq, Asii Chemnitz Narup (IA) nunamut namminermut akisussaasutut tunuassasoq. Aappaalu Múte B. Egede (IA) nunanut allanut akisussaaffimmit tunuassasoq.

Aviisi AG taama allappoq.

Piumasaqaat kingulleq ataatsimiinnermi ullut ataatsimiiffiusut kingulliup tulliani saqqummiunneqarpoq, tassani Naalakkersuisut Nunanut Allanut tunngasutigut naalakkersuinikkut ingerlatsineq pillugu nassuiaatip oqaluuserineqarpoq.

Siumumi oqaaseqartartup, Vivian Motzfeldtip, Kalaallit Nunaata nunanut allanut tunngasutigut naalakkersuinikkut ingerlatsinerata akunnerit sisamaat avillugu sivisussuseqartumik oqallinnermi Múte isornartorsiorpaa.

- Ataatsimiinnerup aallartinnerani Pele Broberg atorfimmit tunuartinneqarpoq, maannalu ukioq manna naammassingajalerpugut, suliassaqarfimmullu akisussaasumik nutaamik suli toqqaasoqanngilaq. Nunani allani kinguariarnertut isigineqarpoq. Maani nunanut allanut politikip pimoorunneqannginneranik paasineqarsinnaavoq. Naalakkersuisunut ilaasortamik nutaamik toqqaasoqartariaqarpoq, akisussaaffimmik taassuminnga tigusisussamik, Vivian Motzfeldt oqarpoq.

Siumulli siusinaartumik juullimut kissaataa piviusunngortinneqarniarpasinngilaq. Múte iliuuseqarusuppasinngilaq.

- Naalakkersuisut siulittaasuat suliassaqarfimmut akisussaasuussasoq aalajangerneqarpoq, taanna oqarpoq, allaffeqarfillu nukittorsarneqartussaasoq ilanngullugu oqaatigalugu.

Aviisimi AG-mi atuarnerusinnaavutit. Aviisi uani pissarsiariuk:

Powered by Labrador CMS