Oqaatsit
Siumup inuusuttai: Qallunaat oqaasiisa akimmisaarpaatigut
Qallunaat oqaasii Kalaallit Nunaanni atugaavallaaqaat nunarsuullu sinneranut attaveqarniarnermut toqqaannartumik akimmisaarutaallutik, politikerit SIS-imeersut isumaqarput
Tuluit oqaasii Kalaallit Nunaanni takornartat oqaasiini salliutinneqassapput.
Siumup inuusuttunut immikkoortoqarfiani SIS-imi ilaasortat marluk, Suinni Fleischer Johansen aamma Steve Olsvig Sandgreen, isumaqarput.
Taakkua nuannaarutigaat Arctic Winter Gamesimi tuluit oqaasii sulinermi atorneqarsimammata.
Amerlasuut tuluttut paasisinnaanngillat
Suinni Fleischer Johansenip Steve Olsvig Sandgreenillu tusarsimavaat issittormiut unammiuaarneranni fjernsynikkut aallakaatitat kalaallit amerlasuut paasisinnaasimanngikkaat, aallakaatitat tuluttut ingerlanneqartarmata.
– Piviusormi saneqqunneqarsinnaanngitsoq tassaavoq nunaqqativut nunat allamiunik attaveqarniarnissaminnik unitsinneqareersut, pissutigerpiarlugu amerlasuut tamakkiisumik tuluit oqaasiinik atuisinnaanngimmata, inuusuttut politikerit tusagassiorfinnut nalunaarummi allapput.
Sunniuteqarpallaartut
Suinni Fleischer Johansen Steve Olsvig Sandgreenilu isumaqarput qallunaat oqaasii toqqaannartumik pissutaasut kalaalerpassuit tuluit oqaasiinik ilikkaruminaatsitsinerannut.
– SIS-imi qularutiginngilarput qallunaat oqaasiinik sunnertippallaarsimasugut, taamaasillunilu nunarsuup sinneranik attaveqarniarnitsinni toqqaannartumik akimmisaarutigaavut, tamannalu peqatigalugu qallunaat oqaasiinik ilikkagaqarniarnitsinni pisariaqanngitsumik nukippassuit atortarlutigit, tamanna silatusaarnissamut tamarmut akerliulluinnaraluartoq, SIS-imi politikerit inuusuttut erseqqissaapput.
Tuluttut oqaluttunik atorfinitsitsigitsi
Tamanna peqatigalugu Suinni Fleischer Johansen Steve Olsvig Sandgreenilu isumaqarput periarfissarpassuit ammaanneqassasut, ilinniagartuunik tuluit oqaasiinik sungiussereersimasunik atorfinitsitsisoqartartuuppat.
– Nunarsuarmut matut ammarutsigik aamma uagut nunanut, oqaatsinut kulturinullu takornartanut ammanerulissaagut, tamatumalu kingunerissavaa nunatta ineriartulernera, uagutsinnut maanimiunut iluaqutaasumik, SIS-imi politikerit oqarput.