Skip to main content

Siumup immikkoortortaqarfia akitsuutinut akerliliivoq

Sisimiuni Siumup immikkoortortaqarfia Inatsisartut qanittukkut aningaasanut inatsimmut isumaqatigiinnialernissaannut allaanerusumik siunnersuuteqarpoq

Illoqarfiit annersaata tulliani Siumup immikkoortortaqarfia, Ole Dorph (S), Steen Lynge (A) Inatsisartunullu ilaasortat saqqumilaarnerit arlallit assigalugit akitsuutit qaffanniarneqarnerannut akerliliivoq.

– Naalakkersuisut akitsuutinik qaffaanissamik pilersaarutaasigut akissaatikinnerit eqqorneqassapput, kalaaliminernik akisoqisunik akissaqarpianngivissut. Taamaattumik Siumut Sisimiut inassutigaa akitsuutinik qaffaasoqassanngitsoq.

Pisissutissat appariassapput

Sisimiuni immikkoortortaqarfiup siulittaasuata Lars Jørgen Kleistip (S) tusagassiorfinnut nalunaarummigut eqqaasitsissutigaa taamanikkut naalakkersuisooqatigiit IA-mit siuttuuffigineqartut akitsuutit qaffanneqarnissaannik siunnersuuteqarmata partii Siumut sakkortuumik isornartorsiuteqarsimasoq.

– Akissaatikinnerit pisisinnaassusiat appariassaaq. Tamakkua tassaapput SIK naapertorlugu akissarsiallit, aalisartut, piniartut, savaatillit akissarsiortullu allat, annikinnerusumik ilinniagallit. Taavalu aamma Kommune Kujallermi, Qeqqata Kommuniani aamma Qaasuitsup Kommuniani innuttaasut Kommuneqarfik Sermersuumit sakkortunerusumik eqqorneqassapput, pissutigalugu Sermersuumi ilinniagartuut amerlanerummata.

Nammineq siunnersuusiorpoq

Nuummi naalakkersuisooqatigiit siuttuinnut naammagittaalliuinnarani Lars Jørgen Kleist akitsuutit qaffannissaannit pitsaanerusorisaminik siunnersuuteqarpoq. Aaqqiissummik nammineq kommunimini atorneqarsimasumik.

– Taarsiullugu inuiaqatigiinni tamatta aningaasarsiatigut akileraarutinut akiliutivut 1 procentimik qaffatsigik. Nunamut akileraarutip 10 procentimut siunnersuutigineqarneratigut Naalakkersuisut naatsorsuutigaat landskarsi tamatumuuna 2016-imi 890,0 millioner koruuninik isertitaqassasoq. Akileraarutinut mallittarisassat allanngortinneqanngippata taanna procentimik ataatsimik qaffanneqarpat ukiumut 79,7 millioner koruunit isertinneqartassapput, Siumup immikkoortortaqarfiani siulittaasoq allappoq.

Akileraarutip qaffannera akitsuutit
qaffannerannit naapertuunneruvoq

Siumup siunnersuutaatigut ´akissaatikitsoq nalinginnaasoq pilersuisoq´ qaammammut 200 koruunit inorlugit akileraarnerusalissaaq, Lars Jørgen Kleist naatsorsuisimavoq.

– Tamanna nioqqutissat ulluinnarni pisiarineqartartut atorfissaqartinneqarnerpaat akitsuutaannik qaffaanermit naapertuunneruvoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER