Siumup ataatsimeersuarnera: Maanna nalilersuisoqalerpoq - Eriulli Nuuk utaqqimaarpaa
Partii Siumup siulersuisuunertaavi ataasinngornermi ataatsimiissapput. Partiip anguniagai nutartikkat oqaluuserineqassapput aammali Siumut Nuuk oqaluuserineqartussanut ilaavoq. Taamak oqaluttuarpoq partiip siulittaasua, Erik Jensen.
Ataasinngornermi ualikkut kingusissukkut unnuttalerlugu partii Siumup siulersuisortaavi ataatsimiissapput, allaffissornermik suliaqartitaminnut ataatsimeersuarnermi aalajangersakkat allaqqissaartereerlugit.
Partiip siulittaasua, Erik Jensen Sermitsiaq.AG-mut oqarpoq oqaluuserisassanut ilaasoq Siumut Nuuk aallaavigalugu eqqissiviilliornerit tunngavigalugit naammagittaalliuutit apuunneqarsimasut:
- Soorunami naammagittaalliuutit apuunneqarsimasut suliassatsinnut ilaapput, tassami akuersaarneqarsinnaanngitsumik iliuutsit ilaasortanit naammagittaalliuuutigineqartut ilaatigut matumani pineqarput, soorunami taakku aamma qaangiataarnavianngilagut iliuuseqarfigissallugillu. Taamaattorli siulersuisuunernit mianersuutassaqarpugut, ilaasortat qulaatiinnarlugit Siumut Nuuk qanoq iliuuseqartariaqarneranik oqqersuiniarneq pissusissamisuussanngimmat, taamaammallu Siumut Nuuk qanoq iliorniarnersoq utaqqimaartariaqarpugut ataatsimeersuarneq sioqqutitsiarlugu ataatsimeersuarnerullu nalaani pissutsit naammagittaalliuutigineqartut qanoq iliuuseqarfigineqarnissaat tassani pileqarluni, Erik Jensen nassuiaavoq.
Tunuliaquteqarani ataatsimeersuaqataaneq
Qanorliuna ililluni inuit ikittunnguit aalajangigaannik parteerujussuup ataatsimeersuarneranut taaseqataasinnaalluni peqataasoqarsinnaasimasoq, ilaasortat piginnaatitsissummik tunniussisimanngippata, taamatuttaaq qanoq ililluni inuit ikittunnguit suliaannik immikkoortortaqarfimmit nassiussatut isikkulerlugit oqaluuserisassanut ilanngutsitsisoqarsinnaasimasoq, nassiusseqataasutut nalunaarutigineqartut peqataaffigisimannginnerarlugit siunnersuutit akerlilersoraat?
Matumani pineqarput Siumut Nuup siulittaasua, Qarsoq Høegh-Dam ;immikkoortortaqarfimmilu siulersuisuni issiasut allat ilaasortanit tunuliaqutserneqarsimanatik ataatsimeersuarnermut peqataajartorsimasut.
Tamatuma saniatigut aamma pineqarput partiip immikkoortortaqarfiata siunnersuuterpassui, pingaarnerusutut Danmarkimik akisussaatitsiniarnermut tunngassuteqartut, tassanilu aamma Danmark nunat tamalaat eqqartuussivissuannut tunniunneqassasoq siunnersuutigineqarluni.
Kommunalbestyrelsimi ilaasortaq Inga Dora Gudmundsdottir Markussen aamma Inatsisartuni ilaasortaq Hans Peter Poulsen siunnersuutit pineqartut Siumut Nuummeersut pillugit illuatungiliipput, namminneq nassiusseqataasimasutut allanneqarsimagaluarlutik.
Partii pakasarneqarsimarpasippoq
Pissutissaqarpoq pasitsassalluni partiip kattuffia aammalumi immikkoortortaqarfia pakasarneqarsimasinnaasut. Tassami ataatsimeersuarneq aatsaat aallartereersoq iliuutsit pissusissamisuunnginneragaasut aatsaat puttussuutilerput.
Erik Jensen siusinnerusukkut Sermitsiaq.AG-mut oqarnikuuvoq naammagittaalliuutit imaannaanngitsut partiimut apuussorneqarsimasut, ilaatigut Siumut Nuup tungaanit iliuutsit naapertuutinnginneragaallutik. Tassunga tunngatillugu Jensen erseqqissaavoq siunissami partii ataatsimeersuassatillugu malittarisassat ileqqorisassallu malillugit piareersarnerit ilumut ingerlanneqarnersut eqqumaffigineqarnerulissasut, tamammi oqartussaaqataanerat tunngavigalugu aamma partiip ataatsimeersuarnera ingerlanneqartartussaammat:
- Nassuerutigisariaqarparput isornartorujussuarnik allaallumi akuersaarneqarsinnaanngitsunik iliuuseqartoqartarsimanera uagutsinnut apuunneqarnikuummat, erseqqissaatigissavarattaarli aamma immikkoortortaqarfippassuatta akornanni immikkoortortaqarfik ataaseq matumani kisimi pineqarami. Tamanna isiginngitsuusaarsinnaanngilarput, taamaattorli oqaatigeqqissavara, iliuuseqartussaq sallerpaaq tassaavoq partiip immikkoortortaqarfia nammineq, kattuffimmiimmi naalakkersorniarsinnaanngilagut qanoq iliussanersut.
Siulersuisuunerniippusi ilissi akisussaaffiginnginnassiuk naammagittaalliuutinut qisuariarnissaq?
- Aap, taamak isikkoqarpoq, kisiannili malittarisassagut ileqqoreqqusagullu ersarissorujussooreeraluarput, neriorsuutigiinnarsinnaavarput siunissami taakku malillugit ingerlasoqarnersoq eqqumanerulissagatta, tassa naapertuutinngitsumik pisoqarnissaa pinaveersimatinniarsinnaavarput, tassa maannakkuugallartoq iliuuserisinnaassarput, taamaattorli aamma sapinngisarput tamaat naapertorlugu partitsinni torersumik ingerlatsisoqarnissaa qulakkeerniagassaraarput pingaarutilik, Erik Jensen Sermitsiaq.AG-mut oqarpoq.
Sermitsiaq.AG-mit Siumut Nuummi ilaasortanik oqaaseqartitsiniarluta sulissutigaarput.
