Aleqap atornerluinera

Siumup aamma Demokraatit inuusuttaat Aleqa pillugu avissaartuuttut

Demokraatit Inuusuttaat Aleqa Hammondip tunuarnissaa kissaatigaat. Siumup Inuusuttaat akerlinganik isumaqarput

lluatungiliuttut qinerseqqusinerat Siumup Inuusuttunut Suleqatigiiffiata siulittaasuata Konraad Boyep ernumanartoqartippaa

Naalakkersuisunut siulittaasuusimasup Kuupik Kleistip Inuit Ataqatigiinneersup Inatsisartut Allaffeqarfiannut Inatsisartunut ilaasortaajunnaarnissamut allagaqarnera tupaallaatigineqarpoq. Kuupik Kleistip 25.034 koruuninik Namminersorlutik Oqartussanut akiitsoqarnini pissutigalugu Inatsisartunut ilaasortatut tunuarniarluni aalajangerpoq.

- Kuupik Kleistip iliuutsiminut kinguneqartitsivoq, taamaattumik kinguneqartariaqarpoq aamma siulittaasutut issiasumut Aleqa Hammondimut, Demokraatit Inuusuttaasa siulittaasorigallagaat Rasmus Dalsgaard Andersen oqarpoq.

- Kuupik Kleistip iliuusaa, akisussaasutut iliorpoq – karsimiilli tillinneq pissuserissaarnissamik ileqqorissaarnissamillu unioqqutitsineruvoq – piliaqarpoq nipangiutiinnarneqartussaanngitsunik aamma piliaqarpoq takkuttartunik aatsaat tullerneqaraangamik. Aamma neriuppugut Knud Kristiansen, Atassummi siulittaasutut nutaatut tatiginnikkunnaarluni taasinissamut siunnersuut suliarineqalerpat eqqarsarluaqqaarumaartoq partii qanoq taasissanersoq. Qinersisartut eqqaamassavaat Siumumut killuussilluni akikinaarisutut, Demokraatit Inuusuttaannit oqaatigineqarpoq.

SIS.: Aleqa, tunuaqinak
Siumut Inuusuttunut Suleqatigiiffiani (SIS) siulittaasup Konrad Boyep Sermitsiaq.AG-mut oqaatigiumanngilaa Aleqa Hammond tunuartariaqarnersoq.

Illuatungiliuttut qinerseqqusinerat SIS-ip ernumanartoqartippaa.

- Qinersinissamik partiit illuatugiliuttut suaartarmata, politikkiminni suna allangortippaat? Allanguinikuunngillat tamannalu isumaqarpoq pissusitoqqanut uteqqissasugut ukiuni Naalakkersuisuufigisaanni (Inuit Ataqatigiit, Demokraatit Kattusseqatigiit Partiiallu) misigeriikkatsituut, Konrad Boye oqarpoq.

- Kukkunersiuinermut Ataatsimiitsitaliap misissuinera ingerlasoq iluarisimaarnarpoq assut. Taanna takutitsissaaq paasissutissanik amerlanerusunik misissuinermik. Qinersisoqassagaluarpat kukkunersiuinermut ataatsimiititaliaata misissuinera unitsinneqassaaq, taamaalillunilu siuliini pisarsimasinnaasut matoorneqassallutik eqqartorneqangitsoorlutillu, Siumut Inuusuttunut Suleqatigiiffiani siulittaasoq Konrad Boye oqarpoq.

Powered by Labrador CMS