Siumumit siunnersuutigineqarpoq: Sapaatip akunneranut ullut sisamat sulisoqartassasoq

Siumut siulersuisuunerisa siunnersuutigaat sapaatip akunneranut ullut suliffiusartut ikinnerulissasut, tamannali piviusunngortinneqassappat nunap aningaasaqarneranut ajoqusiissanngilaq. Siunnersuut partiip sapaatip akunnerata tulliani nuna tamakkerlugu ataatsimeersuarnerani oqaluuserineqassaaq.

Nunami partiit annersaata sapaatip akunneranut ulluni sisamani sulisoqartalernissaata atuutsinneqalernissaa sulissutiginiarpaa.

Tamanna Siumut nuna tamakkerlugu ataatsimeersuarnissaanut siulersuisuunerit siunnersuutaanni takuneqarsinnaavoq. Siunnersuulli piviusunngortinneqassappat piumasaqaatitaqassaaq.

- Nunap aningaasaqarnera sunnerneqassanngippat sapaatip akunneranut ulluni sisamani sulisoqartalernissaa Siumumit sulissutigineqarniarpoq. Siunnersuut piviusunngortinneqassappat aningaasaqarnermut suliffeqarfinnilu naammassisaqatarnermut akornusiissanngilaq, siunnersuummi oqaatitigneqarpoq.

Timersortoqarnerulissasoq

Aaqqissuussaq atuutsinneqalerpat, innuttaasut timersornissaminnut piffissaqarnerulissapput.

- Kalaallit Nunaannit Timersoqatigiit Kattuffiata anguniagaraa, innuttaasut timiminnik aalatitsinerulernissaat. Taamaalilluni ulluni sisamani sulisarnissaq akuersissutigineqassappat, tamanna timersortartut kattuffiannut toqqaannartumik tapersiinerussaaq, siunnersuummi erseqqissaatigineqarpoq.

Kalaallit Nunaannit Timersoqatigiit Kattuffiata anguniagaraa, 2030-mi Kalaallit Nunaata nunarsuarmi timimik aalatitsinerpaaffiulernissaa.

Angusat imaannaanngitsut

Pineqartoq ilisimatusarfigineqangaatsiarsimavoq, nunarsuarmilu sumiiffinni assigiinngitsuni suliffeqarfiit ilaasa tamanna atulereersimavaat.

Siorna atuagaq ”Manden der knuste kalenderen for at gøre sine medarbejdere lykkelige” (Angutip sulisuni nuannaalersinniarlugit ullorsiutit atorunnaarai) saqqummersinneqarpoq, tassani takuneqarsinnaavoq sapaatip akunneranut ulluni sisamani sulisoqartarneratigut imaannaanngitsunik angusaqartoqartartoq.

Atuakkami tunngavigineqarsimavoq danskit suliffeqarfiutaat IIH Nordic, tassani sulisut ukiut marluk sinnerlugit sapaatip akunneranut ulluni sisamaannarni sulisarput.

- Sulisut 49-sut akornanni stressertuerussimavoq, angusarineqartartut marloriaatinngorsimapput, napparsimasoqassaarsimavoq aamma suliffeqarfik 2017-imi 2018-imilu Danmarkimi Suliffeqarfittut Pitsaanerpaatut (IT-mik suliaqartartutut) toqqarneqarsimavoq kiisalu sulinermi avatangiisit tunisassiallu pillugit arlalitsigut nersornaaserneqartarsimalluni, atuakkami tamanna atuarneqarsinnaavoq.

Powered by Labrador CMS