Siumumit qinigassanngortittoq: Suliffissarsiortut tikkuartuinnarnagit
Kalaallisut ilinniarnissamut periarfissat amerlanerusut pilersinneqartariaqartut, Juaanna Abelsen-Petersen isumaqarpoq.
Nuna namminiilivinnissamik neriuuteqassaguni, amerlanerusut sulilernissaannik suliniuteqartoqartariaqarpoq. Siumumit qinigassanngortittoq Juaanna Abelsen-Petersen taama isumaqarpoq.
Tassungalu atatillugu suliffissaaleqisut pisuutinnissaat ikiorsiineruallaanngilaq, taanna isumaqarpoq.
- Tikkuartuinnarnagit suliffeqannginnermut pissutaasut qiviartariaqarpavut, Juaanna Abelsen-Petersen tusagassiuutinut nalunaarummi allappoq.
Tassanilu suliffissaqarnermut aqqutissanik mattussisinnaasut ingammik marluk tikkuarpai. Ilinniagaqannginneq aamma timikkut eqqarsartaatsikkullu unammilligassat.
Kalaallisut ilinniarneq
Ilinniarnermut tunngatillugu pingaarnertut kalaallisut oqaluttunut ilinniarfissatut periarfissanik amerlanerusunik pilersitsisoqartariaqartoq, taanna isumaqarpoq.
- Imali paasineqassanngilaq oqaatsit allat mattunniarlugit, ilinniarfinnik pilersitsisoqarniartoq. Takornartat oqaasiinik ilinniarnermut kajumissuseq annikillisinneqassanngilaq, ilinniartitaanerullu qaffassarnissaanut pitsaassutsip qaffasissuunissaa suli aallunneqassaaq.
- Ukuli pineqarput innuttaasut piginnaasatik, atuagarsornerinnarmiinngikkaluartoq sulisinnaassutsikkulli tunniussassarpassuaqarnerat. Oqaatsitigulli piginnaasatigut aporfilersorneqarnermi, piginnaasami tunniunnissaanut periarfissaqartinneqartannginnerat aqqutissiuunneqarnissaat siunertarineqarpoq.
Taassuma tassani aamma assassornermikkut pikkorissut eqqarsaatigai.
Timimikkut eqqarsartaatsimikkulluunniit ajornartorsiutit pineqarpata, taava taakku inuit piffissap affaanik imaluunniit tamakkiisumik sulisinnaalersinnissaanut qanoq iliortoqartariaqarnersoq ujartorneqartariaqartoq, taanna isumaqarpoq.
- Aamma nalilersuinnginnermi naqissusiinnginnermilu qiviarneqartariaqarpoq, inummut sulilersussamut ikorfartuutaasussat najukkami periarfissaappat? Sulisinnaannginnermut patsisaasut qiviarneqartariaqarput timikkut suliniarnermigut akornuteqarnersoq, ikorfartorneqarlunili sulisinnaanersoq, immaqaluunniitt inuttut atugarisat patsisaanersut.