Siumumit qinigassanngortittoq: Ilinniarnertuunngorniarfinni kalaallisut atuartitsisarnerit amerlanerusut

Inatsisartunut qinigassanngortittoq Inuk Kielsen Fleischerip (S) oqarnera naapertorlugu, kalaallit ilinniartitsisut ullumikkornit amerlanerusut ilinniarnertuunngorniarfimmi atorneqartalissapput.

Siumumit qinigassanngortittup Inuk Kielsen Fleischerip ilinniarnertuunngorniarfimmi akunnerit kalaallisut atuartitsiffiusut amerlisikkusuppai

- Ilinniarnertuunngorniarfimmi kalaallisut oqaatsigut atornerulertigit.

Inuk Kielsen Fleischer Siumumeersoq qineqqusaarummini taama ilanngussamini allappoq.

- Kalaallisut oqaatsigut ilinniarnertuunngorniarfinni atornerulerneqarnissaat sulissutigerusuppara inuusuttagummi atuarnerminni oqaatsit aporfigalugit danskisoorsinnaannginnertik pillugu atuarnertik unitsittarmassuk tamanna akuerineqarsinnaanngilaq, taamaammat iliuuseqarusuppunga oqaatsigut pingaartillugit atuarnerup ingerlanneqartalernissaa, taanna oqarpoq.

Taamaattumillu aamma ilinniarnertuunngorniarfimmi kalaallisut ilinniartitsisut amerlanerulersikkusuppai.

- Nunani allani takusarpagut ilitsoqqussaralugit oqaatsitik atorlugit ingerlalluartut, tamannalu aallaavigalugu uagut aamma nammineq oqaatsigut atorlugit ingerlalertariaqarpugut. Kalaallisummi oqalukkaangatta misigissutsigut isummersortariaaserpullu annertunerusarmat taamaalilluni angusaq annerusinnaalluni, ilinniarnerput immaqaluunniit ilinniariaaserput apparnavianngilaq qaffariaannassaarli, Inuk Kielsen Fleischer erseqqissaavoq.

Inuusuttut amerlasuut ilinniaqqittannginnerat taassuma uggoraa.

- Aamma inuusuttut atuarnermik aallartitserusukkaluartut oqaatsit aporfigalugit aallartinngitsoortartut amerlapput nunatsinnilu pissutsit taamaattut ingerlatiinnarneqarsinnaanngillat ilinniarnermi ilinniakkamillu naammassinninneq namminiilivinnissatsinnut sakkussaraagut, Inuk Kielsen Fleischer oqarpoq.

Powered by Labrador CMS