Siumumit Asiip tunuarnissaa piumasarineqartoq
Inatsisartuni aningaasaqarnermut nunamullu namminermut naalakkersuisoq apeqqarissaarfigineqarmat, Siumumi siulittaasoq Erik Jensen erseqqilluinnartumik oqaaseqarpoq. Kommuneqarfik Sermersuumi ineqarnermut atatillugu suliamik isumaginnissimanini pissutigalugu naalakkersuisutut tunuartariaqartoq, taanna oqarpoq.
Kommuninut Nakkutilliisoqarfiup Kommuneqarfik Sermersuumi ineqarnermut atatillugu suliaq aalajangiiffigimmagu ulloq unnuarlu suli qaangitinngitsoq, borgmesteritut akisussaasuusimasoq, maannalu Aningaasaqarnermut Nunamullu Namminermut Naalakkersuisoosoq apeqqarissaarfigineqarluni oqaluttarfimmiippoq.
Apeqqarissaartoqarnerani Kommuneqarfik Sermersuumi inissianik attartortitsisarneq pillugu suliaq arlaleriarluni qaqinneqarpoq. Erik Jensen isumaqarpoq, Nakkutilliisut isornartorsiuereersut Asii Chemnitz Narup naalakkersuisutut tunuartariaqartoq.
Nakkutilliisut aalajangiinerminni kommunip inissianik isumaginnissimanera sakkortuumik isornartorsiorpaat. Kiisalu periuseq atorneqarsimasoq unitseqqullugu. Inissianik attartortitsisarneq pineqartoq Asii Chemnitz Narupip kommunini borgmesteriunerani isumaqatigiissutigineqarsimavoq.
Attartortitsisarsimaneq malittarisassanik unioqqutitsinerusoq
Nakkutilliisut aalajangiinerminni erseqqissaassutigaat, suleriaaseq atorneqartoq kommunit piginnaatitaanerannut maleruagassanik unioqqutitsinerusoq, tassami kommunip inuussutissarsiornermi attartornermut aningaasartuutai atuisut akiliuteqarnerini isertitaannit aammalu inissianut allaffissornikkut aningaasartuutissanut sipaarutissaannit annertunerummata.
Erik Jensenimut Siumumllu taamatut inerniliisoqarsimanera ima ilungersunartigivoq, allaat Aningaasaqarnermut Nunamullu Namminermut Naalakkersuisoq atuuffimminit tunuartariaqarluni. Tamanna Erik Jensenip apeqqarissaartoqarnerani arlaleriarluni oqaatigaa.
Erik Jensen aamma isumaqarpoq, Asii Chemnitz Narup suliamut atatillugu akisussaassuseqarusunngitsoq, suliamut atatillugu bormesteritut akuutinneqarsimagami, naalakkersuisutut suiamut akisussaaffeqarani.
Suliaq naalakkersuisoqarfimmut allamt nuunneqarsimasoq
Naalakkersuisooqatigiit atuutsinneqalermata aamma Asii Chemnitz Narup (IA) nunamut namminermut naalakkersuisutut akisussaasunngortinneqarmat, politikkerit Kommuneqarfik Sermersuumi ineqarnermut atatillugu nakkutilliisoqarmat suliamut attuumassuteqarpallaartoqarsinnaanera eqqumaffigisimavaat.
Taamaammat Peqqissutsimut Naalakkersuisoq Kirsten l. Fencker nakkutilliilluni suliamut akisussaaffilerneqarsimavoq. Tamanna pivoq Naalakkersuisut Siulittaasuata Naalakkersuisoqarfianit maajip qaammataani inassuteqartoqarneratigut.
Asii Chemnitz Narup isornartorsiuineq oqaluttarfimmiit tusaatissatut tiguneqararpaa, oqaatigaluguli Naalakkersuisut Siulittaasuata akisussaaffigigaa, naalakkersuisunut ilaasortaasanik toqqaallunilu peersitsinissaq.