Skip to main content

Siumumit anisitaasoqalerpa?

Siumumi siulersuisuunerit sineriammilu ilaasortat qineqqusaarnermi ilaasortat pissusilersuutigisarsimasaat oqaluuserisimavaat. Ilaasortalli ilaasa anisitaasariaqarnerannik tamanna kinguneqassanersoq suli nalunarpoq.

Qineqqusaarnerup nalaani Siumukkormiut iluminni tamanit takuneqarsinnaasumik aaqqiagiinngissuteqartareersut nalilersuiffissanngorpoq. Taamatu siulittaasoq Erik Jensen Sermitsiaq.AG-mut ilisimatitsivoq.

Siulittaasup kikkut nalilersorneqarnersut oqaatigerusunngilaa, erseqqissaatigaali qineqqusaarnerup nalaani akerliliinissamut periarfissaqarani partiimut ilumoorussinnginnerit aamma eqqunngitsunik saqqummiussisarsimanerit pineqartut, taakkulu partiimut ajoqusiisimasut.

Partiimi siulittaasuusimasoq Kim Kielsen akunnattuunngiivilluni mingutserisarsimasut ilagaat. Taassuma oqaatigiuaannarsimavaa, qinersisartut kissaatigissappassuk partiimi siulittaasutut ingerlaniarluni. Taamatut nalunaaruteqarnera Erik Jensenip siulersuisuunerillu nalunaarutigisaannut akerliulluinnapoq, tassa Erik Jensen partiimi siuttunit taperserneqarluni siulittaasuusoq.

- Erseqqippoq qineqqusaarnerup nalaani partiitsinni inuit ilaasa partiimut ajunnginnerpaajusussaq sorsuutiginagu parteeqatiminnik tusagassiorfitsigut akerliliisarsimanerat, taanna oqarpoq, erseqqissaatigalugulu eqqunngitsumik suli akerlilerneqanngitsunik saqqummiussisoqartarsimasoq.

Pissaaneqarniuttoqarneranik qattussisoq

Taamaammat partiimi aqutsisut nunaqarfinnilu siulersuisut qineqqusaarnerup nalaani ilaasortat assigiinngitsut qanoq pissusilersorsimanerat misissornialerpaat.

Erik Jensenip ilisimatitsissutigaa, qineqqusaarneri pissusilersuutaasimasut partiimit nalilersorneqassastut aamma ilaatigut kina qineqqusaarnerup nalaani partiiminut pimoorussisuunersoq pimoorussisuunnginnersorluunniit misissorneqarniartoq.

- Siulersuisuunerit nuna tamakkerlugu ataatsimeersuarnermi aalajangiunneqartut ataqqillugit suliuaannarput, ataqatigiinnissarlu sulissutigiuannarlugu. Arlaat arlaannik oqariarluni allarluinnarmik kikkut tamat takusinnaasaannik iliuuseqartarpoq, aamma partiip iluani allarluinnarmik takutitsisarluni, tamannalu ajornartorsiutaavoq, siulittaasoq erseqqissaavoq.

- Unga, siulersuisut immaqalu innuttaasut tamarmik pissaaneqarniunneq qatsupparput. Innuttaasut nunarpullu sullittussaavagut uagutsinnut sullinnata. Tamatumami partiip isigineqarnera aserorpaa.

Ilaasortanik anisitsisoqassanersoq siulittaasup suli oqaatigerusunngilaa.

- Tamanna qanoq pingaaruteqartiginersoq qanorlu kinguneqartinneqassanersoq piffissami qaninnermi nalunaarutigiumaarparput, taakkumi siulersuisuunerni oqaluuserineqaqqaartussaagamik, Erik Jensen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER