Siumumi siulittaasutut qinigassanngortittoq tunuarpoq
Siumup nuna tamakkerlugu ataatsimeersuarnerani siulittaasumut qineqqusaartut pingasuussapput. Tassami Johan Arne Fleischerip siulittaasutut qinigassanngortinnini tunuartippaa.
Johan Arne Fleischer Siumumi siulittaasutut qinigassanngortinnini tunuartippaa.
Tamanna Siumup aaqqissuusaanerani siulittaasup tulliata, Evelyn Frederiksenip, Sermitsiaq.AG-mut ilisimatitsissutigaa.
- Johan Arne Fleischerip siulittaasutut qinigassanngortinnini partiimut nalunaarutigereerpaa, ilisimatitsivoq.
Johan Arne Fleischer Sermitsiaq.AG-imit pissarsiarineqarniaraluarpoq, siullermik sooq qinigassanngortinnersoq, kiisalu sooq siulittaasutut qinersinissamut tunuarsimanersoq, apeqqutiginiarlugu. Tamanna iluatsinneqarsinnaasimanngilaq.
Taamaasilluni Siumumi siulittaasutut qinersinissamut qinigassanngortittut pingasuulerput, tassaasut Kim Kielsen, Vivian Motzfeldt kiisalu Erik Jensen.
Siumut Nuummi Hotel Hans Egedemi nuna tamakkerlugu ataatsimeersuassaaq novembarip 27-anit 29-at ilanngullugu.