Naqqiut: Aki-Matilda Høegh-Dam allaaserisap saqqummereernerani erseqqissaaqqusilluni qinnuiginnippoq Folketingimi pineqaatissiisarneq pillugu tamaviaaruteqarnini qanorpiaq pisimanersoq. Allaaserisami siullermi sakkortunerusumik pineqaatissiisoqartarnissaanik piumasaqarnini Naalakkersuisunit itigartinneqarsimasoq. (Inatsit 2022-mi taasissutigineqareerluni akuersissutigineqarpoq). Erseqqissaatigeqquneqarpoq suli  sakkortunerusumik pineqaatissiisoqartarnissaanik piumasaqaatini Danskit Naalakkersuisuinit itigartinneqarsimasoq.

Aki-Matilda Høegh-Dam, nunatsinni partiit annersaasa tulliani siulittaasussatut sassartoq isumaqarpoq oqaq ataaseq atorlugu nunarput politikkikkut ingerlanneqassasoq:

- Taamaammanuna Nunatsinnut angerlarusuttunga maanilu sunniuteqarsinnaanera atorlugu, pissusissamisuunngilarmi folketingimi issiallunga qanoq ingerlasoqartariaqarneranik nammineq isummersuutikka atorlugit ingerlaniarnissara, taanna Sermitsiaq.AG-mut oqarpoq.

Aki-Matilda Høegh-Dam assersuuteqarpoq:

- Folketingi aqqutigalugu inoqatinik ulorianartorsiortitsilluni pinerluuteqartarnerit sakkortunerusumik pineqaatissiissutigineqartalissasut, pingaartumik meeqqanut pinerluuteqarsimasut matumani eqqarsaatigalugit, tassanilu uanga isumaqarpunga pineqaatissiisarneq (gerningsmandsprincip) sakkukippallaartoq, taamaammallu pillaasarneq (gerningsprincip) atorneqartariaqartoq, Høegh-Dam oqarpoq nangillunilu:

- Naalakkersuisut siunnerfiginikuuaat meeqqanut kinguaassiutitigut pinerluuteqarsimasunut pineqaatissiisarnerit marloriaatinngortinneqassasut. Uangali angorusukkaluarpara suli sakkortunerusumik pineqaatissiisoqartasssasoq, taamaammat tamanna anguniarlugu tamaviaaraluarpunga, danskilli ministeriaqarfiinit itigartinneqarpunga, tunngavilersuutigineqarluni Naalakkersuisut tusaaniarneqarnissaat. Piumasara pinngikkaluarlugu akuersaarpunga, tassami pissusissamisoormat Kalaallit Nunatsinnit politikkikkut anguniakkat salliusussaammata.

Siunnersuut eqqaaneqartoq Folketingimi maajimi 2022-mi akuersissutigineqarpoq inunnillu 18-it inorlugit ukiulinnik pinngitsaaliilluni atoqatiginninnermut kinguaassiuutitigullu allatut pinngitsaaliilluni atoqatiginninnermut pineqaatissiisarnerup 50 procentimik qaffanneqarnissaa pillugu inatsit maani nunatsinni juulip 1-ani 2022-mi atuutilersinneqarpoq.

Qinersinissami tullermi Siumut sassassaaq isumaqatigiinniarnissanut piginnaatitsissummik piumalluni

Aki-Matilda Høegh-Dam isumaqarpoq naalagaaffinngornissamut siunertaqartoqaraluartoq suliniutit annikippallaartut. Taanna isumaqarpoq alloriarnissaq sulissutigineqartariaqartoq pissutissaqanngitsorlu kinguarsaaqqinnissamut.

- Namminersorluni oqartussaanermut inatsit pisinnaatitsissutitaqareerpoq suliat aallartinneqarnissaannut, tassa qanoq ilusilimmik naalagaaffinngornissarput nammineq ilusilersugassaraarput. Maannamut kinguarsaalluni utoqqatsissuterpassuit atorneqartarput, uffa suliassarpassuit utaqqigaatigut, maannakkullu piffissanngorpoq timitalimmik sulissutiginninnissarput, tamannalu nukingernarpoq, Aki-Matilda Høegh-Dam oqarpoq.

Tassani oqartussaaffiit naalagaaffiup Nunarput sinnerlugu suli aqutaasa angerlaanneqarnissai pivigit?

- Naamik, qanoq suleqateqassanerluta isumaqatigiinniutissatsinnik ulikkaarpugut. Danmark isumaqatigiinniaqatigissavarput qanoq ilusilimmik naalagaaffinngornissarput pissanersoq, EU isumaqatigiinniaqatigissavarput suleqatigiinneq siunissami qanoq iluseqartinneqassanersoq pillugu, Naalagaaffiit Peqatigiiffiat isumaqatigiinniaqatigissavarput naalagaaffittut akuerisaanissarput pillugu, NATO isumaqatigiinniaqatigissavarput Nunatta illersorneqarnissaa pillugu, siunissami nunatta killeqarfiisa qanoq nakkutigineqarnissaat pillugu isumaqatigiinniassaagut, USA isumaqatigiinniaqatigissavarput nunatsinni soqutigisai suliaalu pillugit. Tassa tamakku avammut isumaqatigiinniutissatta ilagiinnarpaat, Aki-Matilda Høegh-Dam Sermitsiaq.AG-mut oqarpoq.

Aki-Matilda Høegh-Dam aamma erseqqissaavoq naalagaaffinngornissamut ukiorpassuit ingerlasinnaasut, tassami avammut isumaqatigiinniutissat kisimik pineqartussaanngimmata, nunattali iluani isumaqatigiinniutissat aamma pineqarmata, ilaatigut oqartussaaffiit qanoq ingerlanneqassanersut isumaqatigiinniutigineqartariaqarmata:

- Nunatsinni aalajangertariaqarparput naalagaaffinngornissarput qanorpiaq iluseqartikkusunnerlutigu, Kunngeqarfimmiiginnarusuppugut? Kunngiitsuuffinngorusuppugut? Danmark qanimut suleqatigerusupparput naalagaaffittut naligisatut suleqatigalugu? Aammalu minnerunngitsumik: oqartussaaffiit suli nammineq aqulinngisagut allattorsimaffimmilu tulleriaarneqarsimasut qanoq nunatsinni ingerlakkusuppagut? Eqqaamassavarpummi allattorsimaffiit taakku tulleriaarnerinnaammata Danmarkillu qanoq aningaasartuutigisarnerai pillugit missingerusuutitaqaannartut. Uagut nammineq oqartussaaffiit akisussaaffiillu taakku qanoq suliarerusunnerlugit ilusilersuisinnaavugut ilusilersuissallutalu siulittaasunngorniaq, Aki-Matilda Høegh-Dam, Sermitsiaq.AG-mut oqarpoq.