Aleqap atornerluinera

Siumumi politikkikkut oqaaseqartartup Aleqa annertuumik isornartorsiorpaa

Aleqa Hammondip landskarsimit aningaasanik atuisimanera Karl-Kristian Krusemit isornartorsiorneqarpoq. Kukkunersiuinermut misissuineq naammassereeraluartoq inerniliunneqartoq utaqqimaarneqarpoq

- Siumup Inatsisartuni ilaasortaatitaasa Naalakkersuisut Siulittaasuata Aleqa Hammondip Namminersorlutik Oqartussanut akiligassaqarsimanera akuersaanngilluinnarpaat, Karl-Kristian Kruse oqarpoq

Naalakkersuisut siulittaasuata Aleqa Hammondip landskarsip aningaasaataanik namminerminut atugassaminik aningaasartuuteqarsimanera pillugu suliaq annertusiartuinnavippoq. Aleqa Hammond namminersorlutik oqartussat landskarsiannut 106.363,27 koruuninik akiligassaqalersimasoq nalunaarutigineqartareerpoq, tamannalu aamma akilereerlugu tusagassiortunut katersortitsinermi tallimanngornermi oqarpoq.

Siumup politikkikkut oqaaseqartartuat Karl-Kristian Kruse radioaviisimut sapaammi oqarpoq ' politikerit Nunatta karsianit aningaasanik atuisarsimanerat aatsaallu ukiup ataatsip qaangiunneratigut piffissalluunniit sivisunerusup qaangiunneratigut aatsaat akiliisarsimanerat akuerineqarsinnaanngitsoq'.

- Siumup Inatsisartuni ilaasortaatitaasa Naalakkersuisut Siulittaasuata Aleqa Hammondip Namminersorlutik Oqartussanut akiligassaqarsimanera akuersaanngilluinnarpaat, Karl-Kristian Kruse KNR-imut oqarpoq.

Utaqqimaarneq
Siumup Inatsisartuni ilaasortaatitaasa akiligassaqarsimanermut tunngatillugu misissuinissap inernissaa ataatsimoorlutik isumaqatigiillutik utaqqiniarlugu isummernissamut utaqqimaarallarput.

Sermitsiaq.AG-mit allaaserineqartareerpoq kukkunersiuineq naammassereersoq, tamanna Inuit Ataqatigiinni ilaasortat aamma oqariartuutigereerpaat.

Aleqa Hammondip tusagassiortunut katersortitsinnginnerani Kristian Jeremiassen Sermitsiaq.AG-mut apersorneqartilluni ima oqarpoq:

- Tamanna Inatsisartut nalilissvaat. Kukkunersiuinermut Ataatsimiititaliamit Inatsisartunut paasissutissiissutigisimavarput Naalakkersuisut siulittaasuata landskarsip aningaasaatai namminerminut atorsimagai. Inatsisartunut ilaasortat kisimik aalajangigassaraat tamanna qanoq kinguneqaateqassanersoq. Qularnanngillluinnarporli pisimasoq tamanna puigorneqaannassanngitsoq. Pisimasoq uggornarpoq, naatsorsuutigilliuinnarparalu Naalakkersuisut siulittaasuata akisussaassut tigussagaa, kinguneqaatissai ilanngullugit. Qanoq iliortoqartariaqarpoq, taamatut pisoqaqqinnginnissaa qulakkeertariaqarparput, Kristian Jeremiassen oqarpoq.

Naalakkersuisut siulittaasuat arfininngornerup unnukkuani tusagassiortunik katersortitsivoq. Suli kukkunersiuineq ingerlasoq Aleqap oqaatigaa.

Naalakkersuisut allat landskarsip aningaasaataanik atornerluisimanersut suli misissorneqartoq oqaatigineqarpoq.

Aleqap nassuiaataa
Aleqa Hammondip atornerluisimanini nassuerutigiumanngippasippaa. Kukkunersiuinermut Ataatsimiititaliaq ersarissumik nalunaaruteqaraluartoq Aleqa Hammond KNR-mut nassuiaavoq angalatitseqatigiiffiup kisimi pisuussutigigaa ilaquttami timmisartumut billetsiisa landskarsimit akilerneqarsimanerat. Kukkunersiuinermut Ataatsimiititaliamut illersorluni nassuiaanermini Naalakkersuisut siulittaasuattut siulini Kuupik Kleist akulerussimavaa.

Kuupik Kleistip tamanna aamma nassuerutigisareerpaa, 25.000 koruunillu sukkanerpaamik utertissallugit oqaatigaa.

Powered by Labrador CMS