Skip to main content

Siumumi politikkerit nuimasuut Naalakkersuisut isornartorsiorpaat

Siumup Inatsisartuni politikkikkut oqaaseqartartuata gruppimilu siulissaatuata ammasumik allagaqarnerminni Naalakkersuisut isornartorsiorpaat

Siumup Inatsisartuini politikkikkut oqaaqartartuata gruppimilu siulittaasup Karl Kristian Krusep aamma Jens Immanuelsenip Naalakkersuisut isornartorsiorpaat. Orsussat akitsoriartortut Naalakkersuisunit akuerineqarnerat isumaqatiginngilaat. 

Ammasumik ima marluullutik allagaqarput:

'Ikummatissat akiinik qaffaaneq pillugu

Inuiaqatigiit nammakkersoqqinneqaannarnerat Siumup akuersaaruminaatsippaa, Naalakkersuisullu aqqutissarsiuussinerusariaqarnerat piumasaralugu.

Ukiassalerpoq ukialerpoq ukiortussaallunilu, inuiaqatigiillu uuliamik annertuumik atuinerat akit qaffanneqarnerannut sanilliukkaanni artukkiisoqartoq Siumut isumaqarpoq, Naalakkersuisunullu piumasarivarput piaartumik nalilersuisoqaqqittariaqartoq. 

Ukiuni kingullerni annertuumik inuiaqatigiinni inuuniarnikkut atukkat oqimaalliartorsimapput, pissutaalluni inuiaqatigiit kaasarfiinut naalakkersuinikkut aningaasanik aallertuarnerit aqqutitut siullertut atugaajuaannarneri, tamannalu Siumup annertuumik illuatungilersortarpaa akuersaartarnagulu.

Tamatta takusinnaalerparput uuliap akitsornerata kinguneranik sorpassuit akitigut qaaffaanermik kinguneqartussanngortut tamannalu inuiaqatigiit nammassinnaanngilaat.

Siumumit upperaarput inuiaqatigiit kaasarfiinut aallinngikkaluarluni aningaasat pisariaqartinneqartut aaneqarsinnaasut.

Inuiaqatigiit suliffeqarfiutaasa namminersortunngorsarnerisigut aningaasat isertittakkavut annertuumik qaffassasut, qaffannerisalu kingunerissavaa inuiaqatigiit akissaqanerulernerat.

Pisuussutit nunatsinniik niuerutigineqarnerisa annertusarneqartuarnissaat aningaasanik pisariaqartinneqartunik aallerfiginissaannut aqqutissiuussinerit nukingernerusumik Naalakkersuisut aqqutissiuuttariaqarpaat.

Assartuussinerup unammillerfiulernissaa angusariaqarparput inuiaqatigiit akiliutigisartagaat annikinnerulersikkumallugit.

Aatsitassarsiorfinnik piaarnerusumik ammaasariaqarnerit Naalakkersuisut aqqutissiuuttariaqarpaat, timitaqanngitsunik aatsitassarsiorniartuarnerup oqallisinginera naammappoq iliuuseqarneq amigaatigaarput.

Siumumit aqutsineq silinnerusoq ataatsimoorfiunerusorlu ujartorparput, nunarput inuilu pillugit nammassinnaasaannik aqqutissiuussiniarnermi aqqutissat annerit ilagimmassuk inuiaat ataasiusut nunarpullu ataatsimoorfiusoq.

Uuliap akianik qaffaaneq inuiaqatigiinnut tamanut nammakkiutaavoq annertuumik allannguinermik malitseqanngippat alloriartitsiviunngippallu allaat nukillaarutigineqarsinnaasoq. Tamannalu allanngortittariaqarmat Naalakkersuisut annertuumik inuiaqatigiit oqinnerusumik inuuneqarlernissaannut aqqutissiuussissutigisaminnik saqqummiussaqarnissaat Siumumiit kissaatigaarput.
Kommunit annertuumik kalluarneqartussat oqimaattorsiortinneqarnissaallu pinngitsoortikkumallugu Naalakkersuinikkut nalilersueqqittoqartariaqarpoq, inuiaqatigiinni pissakinnerusut suli ilungersornerulissapput amerlillutillu. Siumumiit tamanna aqqut aqqutigerusunngilarput.

Suut tamarmik akii qaffassapput, soorlu ineqarneq, innaallagiaq, kiassarneq, inuussutissat, atortussat il.il.

Taamatut Naalakkersuisunut piumasaqarluta neriuppugut annertuumik allannguisoqarnissaanik Naalakkersuisut saqqummissiumaartut iliuuseqarlutillu.'

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER