ataatsimeersuarneq
Siumumi politikkeri: Naalagaaffimmit tapiissutinut akilersuisarpugut
Aningaasatigut nammineq ingerlatsinissaq Siumumit sulissutigineqartariaqarpoq. Siumut Nuummit Mikael Petersen oqarpoq
Kalaallit Nunaata nammineerluni aningaasatigut napatilersinnaanera pillugu suleqatigiissitaliortoqartariaqartoq Mikael Petersenip aamma Siumut Nuummit siunnersuutigineqarpoq
- Nunatta aningaasatigut nammineq napatilersinnaanera sulissutigineqartariaqartoq siunnersuutigaarput. Aamma avammut tunisisarnerit immikkut misissuiffigineqartariaqarnerat misissorneqartariaqarluni, Mikael Petersen oqarpoq.
Qaleralinnik avammut tunisisarneq pitsaanerusariaqartoq isumaqarpoq.
- Avannaani qalerallit 25.000 tonsit pisarineqartarput. Ukiumut agguaqatigiisillugu 450 million koruuninik nunarput iluanaaruteqartarluni. Minnerpaaffilerlugit Danmarkimut tunineqartarput kilomut 18 koruuneqartinneqartarlutik, Danmarkimiillu nunanut allanut tunisinermi kiilumut kilomut 50-60 koruuneqalertarlutik, Mikael Petersen oqarpoq nangillunilu:
- Qalerallit taakku 1,5 milliard koruuninik iluanaarutigisinnaagaluarpagut, kisiannilu tassa ukiumut agguaqatigiisillugu 450 million koruunissutigisarpagut, isertinneqartummi 450 millionit Danmarkimiiginnartarput.
Nunanut allanut tunisineq pitsaanerusoq
Kalaallit Nunaata Danmarkillu niueqatigiittarnerat misissorneqartariaqartoq nutarsarneqartariaqartorlu isumaqarpoq, Kalaallit Nunaannut aningaasat isertartut amerlanerulernissaat anguniarlugu. Kiisalu iluanaarutaasut Danmarkimiiginnartarnerat aamma iliuuseqarfigineqassasoq oqaatigalugu. Danmarkip nunanut allanut tuneqqikkaangagit Kalaallit Nunaata aningaasanik pisalernissaa aamma kissaatigaa.
- Kalaallit Nunaanni uumasut uumaatsullu aqutarilerpagut namminersuleratta 2009-mi. Taamaattumik nunanut allanut tunisaqartarnerput pillugu inatsisiliorsinnaavugut, uagutsinnut iluaqutaanerulersussamik, Mikael Petersen oqarpoq ilanngullugulu oqarluni aningaasatigut nammineq napatittumik ingerlalersinnaaneranik una suleqataasinnaasoq.
Naalagaaffimmit tapiissutinut akilersuisarpugut
Aalisakkanik akinik minnerpaaffilikkanik akilinnik nunarput 2 millard koruuninik isertitaqartartoq Mikael Petersenip nassuiarpaa, taakkulu ukiumut 6 milliardinngortinneqarsinnaasut oqaatigaa. Danmarkip avataatigut nammineq avammut tunisassiulersinnaagaanni tamanna piviusunngorsinnaasoq oqaatigalugu.
- 6 milliardinik isertitaqartarsimasinnaagaluarpugut, uagullu Danmarkimut 3,5 milliardinik nioqqutissanik pisisarpugut.
- Aalisarnikkut tunisinermi 2 milliardinik tunisisarpugut, 4 milliardit Danmarkimiiginnartarput, Danmarkimilu nioqqutissanik 3,5 milliardinik pisisarluta. Ukiumut Naalagaaffeqatigiinnitsinnit 3,5 milliardinnassutigisarparput. 6 milliardinit 9 milliardinut ukiumut tapisiaqarnerput akilertaripput oqaatigisarpara, apeqqutaasarpormi qanoq annertutigisumik Danmarkimut tunisisarnerluta, Siumup Maniitsumi ataatsimeersuarnerani Sermitsiaq.AG-mit malinnaasumut Mikael Petersen oqarpoq
Ataatsimeersuarneq sisamanngorpat naggaserneqassaaq
Namminersulernitta kingorna tapiissutit qerisinneqarput, ukiut tamaasa 3.439,6 milliard koruuninik nunarput pissarsisarluni.
Naalakkersuisut suleqatigiisitaliornissaat Mikael Petersenip kissaatigaa, aalisakkanik minnerpaamik akigitinneqartuni tunisat ukiumut 2 milliardiusarmata, tamannalu annertunerusunngortinniarlugu misissorneqarnissaa kissaatigaa, nunatta aningaasaqarnera pitsaanerulernissaa eqqarsaatigalugu.
Siumup nuna tamakkerlugu ataatsimeersuarnera sisamanngorpat naammassineqassaaq, nalunaaqutaq 19.00 nerersuaaqatigiittoqassalluni, kiisalu siulersuisut nutaat ivertinneqassallutik, aammalu politikkikkut anguniagassat saqqummiunneqassallutik.