Siumumi nuimasumik inissisimaffilik Naalakkersuisunut sakkortuumik isornartorsiuisoq
Inatsisartuni Aalisarnermut Ataatsimiititaliap siulittaasorisimasaata, Henrik Fleischerip (S), Naalakkersuisut isornartorsiorpai aalisarsinnaanermut akuersissummut sukannersunik piumasaqaateqarnermigut Arctic Prime Fisheriesimik ajutoortitsisutut. Aalisartitseqatigiiffik akiliisinnaajunnaariartulerpoq, taanna isumaqarpoq.
Naalakkersuisut Arctic Prime Fisheriesimut, APF-imut, saarullinniarnermi aalisarsinnaanermut akuersissuteqarnermi piumasaqaataat ima sukannertigilersimapput, Kujataani aalisartitseqatigiiffik maanna akiliisinnaajunnaaraluttualerluni.
Aviisi Sermitsiaq allappoq.
Tamannalu Kommune Kujallermi suliffippassuit annaaneqarnerannik isumaqassaaq.
Taama Siumumi pissaaneqarnerpaat sunniuteqarnerpaallu ilaata, Henrik Fleischerip, isornartorsiuinera nipeqarpoq.
Taanna Inatsisartut Aalisarnermut Ataatsimiititaliaannut siulittaasuusimavoq partiillu siulittaasortaavanut Erik Jensenimut tapersersortaalluartut ilagalugu.
Inatsisartut tamakkiipajaartumik isumaqatigiissut qaammatit paatsiveerusimaarfiusut arlallit ingerlareersullugu sapaatip- akunnerani kingullermi marlunngornermi apriilip 6-ani marlunngornermi Inatsisartunut qinersisoqarnissaa akuersissutigaat.
Tamanna sioqqullugu Inatsisartuni tunuliaquttat akornanni Naalakkersuisut APF-imut pinninnerat pillugu politikkikkut pissanganartorsiorfiusumik pisoqarsimavoq. Naalakkersuisut Kim Kielsen siuttoralugu aalisartitseqatigiiffiup Arctic Prime Fisheriesip ukioq manna Tunumi saarullinniarneranut aalisarsinnaanermut akuersissuteqarnermi piumasaqaatinik allanngortitserusunnginnerat pillugu politikkikkut suliaq nuanniitsoq pineqarpoq.
Taamatut qassiiliortoqarnera qinersinissamik pilersitseqataasoq, Sermitsiap Inatsisartuni tusarfinnit arlalinnit tusarpaa.
Henrik Fleischerip APF-ip akiliisinnaajunnaariartuaaleresimanera toqqaannartumik ernummatigaa.
– Naalakkersuisut aalisartitseqatigiiffimmut tulaassuisussaatitaanermik sukannernerulersitsinerisigut, taamalu aalisariutit saarullinnik 2.500 tonsinik siullernik 100 procentimik tulaassisussanngortinnerisigut, APF misigisimavoq, Naalakkersuisunit assigiinngisinneqarlutik malersorneqarlutillu. Arctic Prime Fisheries akiliisinnaajunnaassappat, suut tamarmik eqqugaassapput. Kujataani Tunumilu aalisakkerivinni sisamani aalisariutinillu sulisut suliffimminnik annaasaqassapput, Henrik Fleischer oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: