Siumumi aqutsisut kinguaassiuutitigut inniminniilliortarnerit pillugit: Partiip allaffeqarfiani toqqissisimasoqarpoq

Siumut aqutsisui partiimi kinguaassiuutitigut inniminniilliortoqarneranik ilisimasaqannginnerarput

Siumut landsmøde i Sisimiut

Siumumi siulersuisut kinguaassiuutitigut inniminniilliortarnermut akuersaanngillat, partii tusagassiorfinnut nalunaaruteqarnermi erseqqissaavoq.

Taamaakkaluartoq arnat qulit kinguaassiuutitigut inniminniilliortoqartarnerup ileqquunera allaaserisimavaat, ileqqoq partiip allaffiani sulisunit taamaallaat atorneqanngitsoq, aammali politikkeritut qinikkanit ulluinnarni allaffimmi najuuttartunit atorneqartartoq.

Allakkanimi atuarneqarsinnaavoq, kinguaassiuutitigut inniminniilliortarneq arlaannilluunniit iliuuseqarfigineqartarni nalinginnaasumik akuerisaasoq, arlalitsigullu inniminniilliornermut peqataasoqartartoq.

Arnaq alla Sermitsiaq.AG-mut oqaluttuarsimavoq, ukiorpassuit matuma siornali kinguaassiuutinut tunngatillugit oqaatsit sakkortuut atorneqartarnerat nalinginnaasuusoq.

Nassuiaatigineqartut naapertorlugit, taamatut kinguaassiuutitigut inniminniilliortarneq Siumut allaffeqarfiani ammaannartumik pisarsimavoq, partiimi politikkerit nuimasut ulluinnarni najuuffigisartagaanni.

Taamaakkaluartoq Siumumi aqutsisut tamatumannga maluginiagaqarsimaparsinngillat.

- Uanga nammineerlunga Inatsisartuni ilaasortaasimavunga, taamanikkullu isumaqarpunga partiip allaffeqarfia nalinnginnaasumik toqqissisimanartuusoq, soorunami allat sinnerlugit tamatumunnga tunngatillugu oqaaseqarsinnaanngilanga aamma ullumikkut silaannaq qanoq ittuunersoq pillugu, partiimi aaqqissuussaanikkut siulittaasup tullia Evelyn Frederiksen Sermitsiaq.AG-mut allakkatigut akissuteqarluni allappoq.

Aliasuutigingaa

Sammineqartoq pillugu oqaaseqartussatut partiimit toqqarneqarsimavoq.

Aallagaani takuneqarsinnaanngilaq, partiip allaffeqarfiani silaannaq qanoq innersoq qanorlu oqaloriaaseqartoqarnersoq pillugit paasissutissanik partiip siulittaasuanut Kim Kielsenimut silittaasulluunniit tullianut Karl-Kristian Krusemut pissarsiniarsimanngitsoq, kingullertut pineqartoq ulluinnarni siulittaasup aamma akulikitsumik iserfigisartagaani allaffeqarfimmiittarpoq.

Evelyn Frederiksenip aammaarluni erseqqissaatigaa, inummut tunngatillugu suliat saaffiginnissutilluunniit siulersuisut tigusimasaat pillugit oqaaseqarniarnani. Sermitsiaq.AG-mit oqaluttuarineqartutut, arnanit qulinit saaffiginnissutit taakku partiimi allattaasimasup Mikael Petersenip kinguaassiuutitigut inniminniilliortarsimaneranik oqaluttuartuupput.

- Inatsisartuni allattoqarfitsinni taamatut kanngunarsaasoqartarsimappat aliasuutigaara, skriver Evelyn Frederiksen allappoq.

- Saaffiginnissutigineqartut pimoorullugit tiguavut

Sermitsiaq.AG-mit ilaatigut aperineqarpoq, arlaannaannilluunniit iliuuseqartoqarani kinguaassiuutitigut kanngunartuliortorqartarnera ilisarisinnaaneraa, partiip allaffeqarfiani taamak erseqqitsigisumik kanngunartuliortoqartarnera partiimi aqutsisunit qanoq ililluni ilisimaneqarsinnaannginnera kiisalu saaffiginnittoqannginnerani sooq siusinnerusukkut iliuuseqartoqarsimannginnera pillugit.

Apeqqutinut taakkununnga ataatsimut akissuteqarpoq.

- Siumumi siulersuisut saaffiginnissutit tamaasa pimoorullugit tiguneqartarput, arlaallu nuanniitsunik killissamilluunnii qaangiisumi misigisaqarsimagaangat sakkortuumik iliuuseqartarlutik. Allanut tunngatillugit siusinnerusukkut qisuartarsimavugut, siunissamilu aamma taamaaliortassaagut, Evelyn Frederiksen akissummini allappoq.

Oqaloqatiginninniartut

Sermitsiaq.AG-mit ilanngullugu apeqqutigineqarpoq, taamatut pisoqaqqissinnaanera pinngitsoortinniarlugu siulersuit qanoq iliuuseqalersaarnersut, kiisalu partiip allaffeqarfiani nalinginnaasumik taamtut oqaloriaaseqarnerup taamatinneqarnissaanik pisariaqartitsisoqarnersoq.

- Ilaasortatsinnut pulaartorisartakkatsinnullu pitsaasumik nipeqarluni oqaluussisarnissamik naatsorsuutiginninnerput pillugu allattoqarfitsinni sulisut ulluinnarni aqutsisunit oqaloqatigineqarniarput allattoqarfimmi sulisunik oqaloqateqarniarput, velyn Frederiksen akissummi naggasiilluni allappoq.

Mikael Petersen imminut illersorluni Sermitsiaq.AG-mut imatut nassuiaateqarpoq:

- Ilimanarsinnaavoq eqimattakkuutaani quujasaarlunga kinguaassiutit pillugit oqaaseqarsimasinnaanera. Oqaloqatigiittariaaseq taamaattuummat, allat aamma taama pinngitsooratik oqaaseqarnikuupput.

Politikkerit kinguaassiutitigut innimiilliortarnerannik innarliisarnerannillu paasissutissaateqaruit, oqaluttuarerusukkukkillu, taava Walter Turnowsky walter@sermitsiaq.gl imaluunniit +299 562248 aqqutigalugit saaffigisinnaavat.

Powered by Labrador CMS