Siumumi akerliusut ikinnerussuteqarnertik tusaatissatut tiguaat
Siumut immikkoortortaqarfiini amerlanerussuteqartut Kim Kielsen siulittaasutut tapersersorpaat. Siumumi akerliusut arfineq-marluusut taama naliliineq tusaatissatut tiguaat.
Immikkoortortaqarfiit tusarniaanermi akissuteqartuni 40-suni 36-t Kim Kielsen partiimi siulittaasutut tapersersorpaat.
Inatsisartuni ilaasortat arfinillit aamma aatsitassanut suliffeqarnermullu naalakkersuisoq, Erik Jensen, tusarniaanermi akissutigineqartut ataatsimiissutigisimavaat.
- Maluginiarparput immikkoortortaqarfiit kiisalu siulersuisuunerit allakkiorsimanerput ilaleraat. Tassami siulittaasup inuiaqatigiinni ersarinnerunissaa kiisalu naaperiaasarnissaanik tusarnaarsinnaanerunissaanillu piumasaqarsimanerput immikkoortortaqarfinnit piumasaqaatigineqarsimasoq erserpoq, akerliliisunit nalunaarutigineqarpoq.
Nutaamik siulittaasortaarnissaq naatsorsuutigigaat
Akerliusimasut isertuutinngilaat partiimi siulittaasunngortussaq suliassaqangaatsiartoq. Tusagassiutinut nalunaarutiminni erseqqissaatigaat maluginiarsimallugu maanna siulittaasuusoq ataatsimeersuarnermi tullermi, aappaagu pisussami, siulittaasutut qinigassanngorteqqissanani nalunaaruteqarsimanera.
Kim Kielsenili Sermitsiaq.AG-mit apersorneqarnermi oqarpoq partiip siulittaasuatut qinigassanngorteqqinnissani isumaliutersuutigalugu.
Akerliusulli aamma erseqqissarpaat Siumumi isumaqatigiinnginnerit inissaqartartut, taakkulu partiip suleqatigiilluarnerulernissaanut aqqutissat ilagisinnaagaat.
- Naggataatigut qilanaaralugulu erinigeqaarput siulersuisuunerit Inatsisartut ukiaanerani ataatsimiinnissaat sioqqutilaarlugu naapinnissaat. Tassanimi ilutsinni oqaloqatigiilluarnissarput
pisariaqavippoq aammalu illuatungeriinnut naapperiutaasinnaasut tamarmik qaqilerneqarsinnaaniassammata, akerliusut oqaaseqartartuat tusagassiutinut nalunaaruteqarluni allappoq.
Akerliusut tusagassiutinut nalunaarutaat aallaavigalugu Sermitsiaq.AG apeqqutissaqaraluarpoq. Apeqqutilli maanna akineqarsinnaanngillat, akerliusut oqaaseqartartuat Anders Olsen (S) saaffiginnissutinut suli qisuarianngimmat.
Sermitsiaq.AG-p paaserusuppaa akerliusut suli Kim Kielsenimik tatiginninnginnersut, aammalu Kim Kielsenip siulittaasutut qinigassanngortinnissamut sassaqqinnissamik isumaliutersuuteqarnera qanoq isumaqarfigineraat.