Siumumi akerleriinneq: Vivian Motzfeldt siulittaasutut sassarpoq
”Avissaartuunneq pinnagu – ataatsimoorneq toqqartigu” Vivian Motzfeldt-ip partiimi Siumumi siulittaasussatut sassarnissaminut aalajangernermini tunngavilersuutaasa pingaarnersaraat
Kim Kielsen suli eqqarsarfeqarpoq, Erik Jensen Inatsisartut ukiaanerani ataatsimiinnerisa nalaani sassarnerminik nalunaaruteqarpoq, maannalu arnamik unammillerteqalerput.
Sermitsiaq allappoq.
Inatsisartut siulittaasuat, 47-nik ukiulik Vivian Motzfeldt nunatsinni partiit pisoqaanersaanni anginersaannilu Siumumi siulittaasussatut sassassalluni aalajangeqqammerpoq.
– Periarfissat tamarmik ammapput, aamma kikkulluunniit partiimut ilaasortat kiffaanngissuseqarput siulittaasussatut sassarusunnerlutik. Eqqarsaatigilluareerlugu aalajangerpunga partiinni siulittaasussatut sassarniarlunga. Siullermik qularinnginnakku siulittaasup piginnaasassaatut Siumup pisariaqartitai naammassilluarsinnaagakkit, aamma qularinngilara sulissutigerusullugulu partiitsinni ataatsimoorneq nukittorsarluarsinnaallugu siulersuisut aammalu ulluinnarni aqutsisut peqatigalugit, Vivian Motzfeldt qulanngilluinnarluni oqarpoq.
Tunngavilersuutit tallimat
Vivian Motzfeldt (S) siulittaasussatut sassarnermini tunngavilersuutai tallimaapput, taakku ilaatigut tunngavigalugit Siumup aasaru 8.-10. julimi ataatsimeersuarnissaani siulittaassamik qinersinermi peqataasussat kaammattorpai imminerminik qinerseqqullugit:
- 1) Ataatsimoorneq nuna tamakkerlugu nukittorsarneqassaaq
- 2) Nuna tamarmi naligiinnerusumik ineriartortinneqassaaq
- 3) Kommunit agguataarnerat nalilersorneqassaaq allanngortinneqarlunilu, taamaaliornikkut Tunu immikkut kommuneqartinneqalissasoq sulissutigineqassaaq
- 4) Imminut pilersorneq nalituunngorsaasarnerlu nunatsinni annertusarneqassapput
- 5) Inuiattut kinaassuseq illersorneqarlunilu ataqqineqassaaq
Ataatsimoorneq
Vivian Motzfeldt (S) naapertorlugu inuiaqatigiit kalaallit inuiassuarnut allanut sanilliullugu arlalitsigut qajannartortaqarput eqqumaffigisassamik:
– Inuiattut ikittunnguuvugut. Isumaga malillugu nukiit annertuallaat avissaartuunnissamut atorpavut ataatsimoornerlu tunulliuteqqajaasarlugu. Pisariaqarluinnarpoq Inatsisartut, kommunit nunallu immikkoortui akimorlugit ataatsimoorneq anersaaralugu ineriartortitsinissaq.
Allaaserineqartoq tamakkiisumik aviisimi Sermitsiami tamakkiisumik atuaruk. Aviisi uani pisiarineqarsinnaavoq:
