bitter strid
Siumumi akerleriinneq: Vittup Per B. anisinniarpaa
Vittus Qujaukitsup parteeqanni Per Berthelsen qatsutingaaramiuk Inatsisartunit anisinniarpaa
Siumukkunni aasaq aliannaarsiorfiunngeqaaq.
Ataasinngormat aningaasaqarnermut nunallu iluani pissutsinut Naalakkersuisup Vittus Qujaukitsup isertuutinngilaa parteeqanni Per Berthelsen ima qatsutsigalugu, Inatsisartunit anisikkusullugu.
– Isumaliutigaara Inatsisartunit sulinngiffeqarallarnera kipitinniarlugu. Piffissami kingullermi pissutsit akuerineqarsinnaanngitsut naammagilerpakka. Inuit suleqatigiinnissamik pinngitsaalinngilagut. Suleqatiginnikkumanngitsut peerlugit!, Vittus Qujaukitsoq Facebookimi quppernermini allappoq.
Taamaariarmat Per Berthelsenip - aamma Fadebookimi - Vittus Qujaukitsoq akillugu saassuppaa:
– Tusarpara Vittus Qujaukitsup Inatrsisartunit anisinniarsarigaanga, pissutigalugu naalakkersuisoqarfiani pisortaa soraartoq/soraarsitaasoq nersualaarlugu oqaaseqarsimagama. Inatsisartunit sulinngiffeqarallarneq atorunnaarsinniarneqarpat tamanna tamanut atuutissaaq. Taamaasilluni inunnut tunngassutillit qaangissavavut, tamanna ileqqunngussagaluartoq Naalakkersuisunut ilaasortap aamma imminut nakkutigisinnaanissaanik, tamatumuunakkullu oqartussaaqatigiinneq annertuumik sakkukillineqassaaq, taamaasillunilu pissaaneqarnermi sukat marluk akornanni assigiinngissuteqarneq sanngiillisarneqassaaq. Misiliisimavungali, takusimasakkalu ima annertutigaat tuikka qullaannartariaqarlugit.
Atuaruk "Pisortaaneq tunuarpoq"
Per Berthelsenip issiavia ulorianartorsiorpoq
Marsimi qinersinermi Per Berthelsen qinersinermi 112-nik taaneqarpoq - qinersinermi kingullermi 160-inik taaneqarsimalluni - taamaasillunilu Inatsisartunut qinigaanngitsoorluni. Kingornali Inatsisartuni inissiat pilerigineqartut 31-it ilaat pivaa, tassa Vittus Qujaukitsoq Naalakkersuisunut ilaasortanngorami Inartsisartunit sulinngiffeqarallalermat. Issiavimmillu taassuminnga Per Berthelsen arsaarnissaanik Vittus Qujaukitsoq sioorasaarivoq.
Millionilinnik soraarnerussutisivoq
Siumumi politikerit taakkua marluk akornanni oqallinneq uissuumminartoq sakkortoorlu pilerpoq, Sermitsiaq.AG-p oqaluttuarimmagu Aningaasaqarnermut Nunallu iluani Pissutsinut naalakkersuisoqarfimmi pisortaasimasoq Jan H. Lynge-Pedersen maajip 30-anni atorfimminit ingerlaannavik tunuarami 2 millioner koruuninik soraarnerussutisiaqartinneqarsimasoq.
Soraarnerussutisiat tunniunneqarput namminersorlutik oqartussani pisortaanernik isumaqatigiissut atuuttoq malillugu, Vittus Qujaukitsoq paragraf 37 malillugu Inatsisartunut ilaasortap Palle Christiansenip apeqqutaanut akissummini oqarpoq.
Atuaruk "Pisortaasimasoq 2 millioninnappoq"
Soraarsitsineq ajuusaarutigaa
Per Berthelsenip AG normu 27-mi oqaatigaa ´tupaallaatigalugu´ ajuusaarutigalugulu Jan H. Lynge-Pedersen Aningaasaqarnermut Nunallu iluani Pissutsinut Naalakkersuisoqarfimmit soraarsimanera.
Sermitsiaq.AG-p Vittus Qujaukitsoq oqaaseqartinniarsaraa. Per Berthelsen feriarpoq pisimasorlu annertunerusumik oqaaseqarfigiumanagu.
AG normu 27-mi ilaatigut allaaserisaq "Per B.: Soraarsitsineq ajuusaarutigaara" atuarsinnaavat. Aviisi pisiariuk uani: