internetsi

Siumumeersoq: Ilinniartut akeqanngitsumik internetsersinnaalerlik

Inatsisartuni ilaasortap Siumumeersup ilinniagaqartut akeqanngitsumik internetsersinnaalersikkusuppai

Ilinniartunut akeqanngitsumik internetsersinnaalersitsinissaq qanoq akeqassanersoq Karl-Kristian Krusep Siumumeersup Naalakkersuisut misissuiffigeqquai

Ilinniarusuttut amerlanerulernissaat kissaatigalugu Karl-Kristian Krusep Siumumeersup ilinniagaqartut akeqanngitsumik internetsersinnaalersikkusuppai. Tamanna pillugu Naalakkersuisunut paragraf 37 naapertorlugu apeqquteqarpoq.

Ilinniarfeqarfinni ilinniartullu angerlarsimaffiini killilimmik internetsertoqartarpoq. Taamaasilluni ilinniagaqartut ilaat internetsersinnaajumallutik pisisariaqartarput. Tamanna Inatsisartuni ilaasortap Karl-Kristian Krusep allanngortikkusuppaa.

Tamanna nunatta karsianut qanoq annertutigisumik akeqassanersoq Naalakkersuisunut apeqquteqarpoq.

Pisariaqartoq
- Ilinniartut ilinniarsimasullu siunitsinni annertuumik pisariaqartippavut, ullunilu makkunani attaveqaatitigut ineriartorsimanerup kiguneranik nunarsuarmioqataanermi internet pinngittoorneqarsinnaajunnaarsimavoq, ilinniarnermilu paasissutissarparujussuit sakkussarparujussuillu pissarsiarineqarsinnaallutik.

- Taamaattumik ilinniarneq ilinniarsimasullu siuarsarumallugit nunatsinni ilinniarnermi atugassaasut aamma siuarsartariaqarmata akeqanngittumik atuisinnaanerat aqqutissiuuterusunnarpoq, Karl-Kristian Kruse oqarpoq nangillunilu:

- Ilinniartut ineqarfiini pingaartorujussuartut oqaatigisariaqarpoq ilinniarnerup nalaani internet pinngittoorneqarsinnaajunnaarsimasoq, taamaattumik internet najugaqarfinni akeerutsinneqarpat pisariaqartitatsinnut ilinniarsimasunik siunissami annertuumik kinguneqarluarsinnaasoq takusinnaavara, ilinniartunullu annertuumik oqilisaassissussaalluni.

Powered by Labrador CMS